محکمہ بہبود آبادی میں ڈیپوٹیشن پر آئے افسران کو واپس بھیجا جائے، ایپکا
کراچی (پ ر) آل پاکستان کلرکس ایسوسی ایشن ایپکا کا اجلاس کراچی ڈویژن کے صدر سید توقیر حسین شاہ کی زیر صدارت کراچی ڈویژن کے آفس میں ہوا۔ اجلاس میں محکمہ پاپولیشن ویلفیئر ڈپارٹمنٹ سندھ کے صدر محمد پیرل دایو، محمد وسیم الدین، سیکرٹری اطلاعات صوبہ سندھ، ایپکا کراچی ایسٹ کے عہدیداران میں چوہدری عبدالغفور، شاہین اختر، مرسلین، سعیدہ، ایپکا کراچی ویسٹ سے سید ذوالفقار علی شاہ، بورڈ آف سیکنڈری ایجوکیشن سے خاور کمال، رفیق صدیقی، اندرون سندھ کے عہدیداران میں رجب علی سولنگی، ضیا سولنگی، فرید سورائیو، سید نذیر شاہ مشوانی، دوست علی شیخ، عاشق علی بھنگر نے شرکت کی۔ اجلاس میں متفقہ قرارداد منظور کی گئی کہ محکمہ پاپولیشن ویلفیئر ڈپارٹمنٹ سندھ میں دوسرے محکموں سے ڈیپوٹیشن پر آئے ہوئے افسران کو 20/ اپریل تک واپس نہ بھیجا گیا تو 22/ اپریل سے سندھ بھر میں سخت احتجاج کیا جائے گا۔ علاوہ ازیں ضلع حیدرآباد سے معطل کیے گئے ملازمین کو فوری طور پر بحال کیا جائے۔ نیز محمد پیرل دایو صدر محکمہ بہبود آبادی سندھ نے آخر میں کہا کہ مہنگائی کے تناسب سے سرکاری ملازمین کی تنخواہوں اور ریٹائرڈ ملازمین کی پینشن میں اضافہ کیا جائے اور سرکاری اداروں سے سیاسی مداخلت ختم کر کے سرکاری ملازمین کو تحفظ فراہم کیا جائے کیونکہ سیاسی مداخلت سے ملازمین عدم تحفظ کا شکار ہیں۔ اجلاس میں قرارداد کے ذریعے سید قائم علی شاہ وزیر اعلیٰ سندھ اور ان کی کابینہ کو مبارکباد دیتے ہوئے سرکاری ملازمین کے مطالبات حل کرنے کی اپیل کی گئی۔

__________________