مخالفین اوچھے ہتھکنڈوں سے ہراساں کرنا چاہتے ہیں، حبیب میمن



کراچی (اسٹاف رپورٹر) کراچی سے قومی اسمبلی کے حلقہ این اے 249 کیلئے پیپلز پارٹی کے امیدوار عبدالحبیب میمن نے کہا ہے کہ شکست کے خوف سے مخالفین گھبراگئے ہیں اور وہ اوچھے ہتھکنڈوں کے ذریعے انہیں ہراساں کرنا چاہتے ہیں لیکن وہ مخالفین کی حرکتوں سے خوف زدہ نہیں ہوں گے۔ یہ بات انہوں نے جمعہ کو کراچی پریس کلب میں پریس کانفرنس سے خطاب کرتے ہوئے کہی۔ اس موقع پر صوبائی اسمبلی کے حلقہ پی ایس 110 اور پی ایس 111 کے لئے پیپلز پارٹی کے امیدوار محبت خان نیازی، حبیب جان، مزدور رہنما زاہد حسین اعوان اور اشرف عباسی بھی موجود تھے۔ عبدالحبیب میمن نے کہا کہ میں پاکستان پیپلز پارٹی کا بنیادی ممبر اور گزشتہ تین انتخابات سے قومی اسمبلی حلقہ Na-249 سے پیپلز پارٹی کا نامزد امیدوار رہا ہوں اور سابقہ انتخابات میں ریکارڈ ووٹ لے چکا ہوں۔ ماضی میں اس حلقہ انتخاب سے میرے چھوٹے بھائی ممتاز مزدور رہنما عبدالعزیز میمن کامیاب ہوچکے ہیں اور اس مرتبہ بھی پارٹی کی چیئرپرسن بے نظیر بھٹو صاحبہ نے مجھ پر اعتماد کرتے ہوئے مجھے حلقہ 249 قومی اسمبلی سے ٹکٹ جاری کیا ہے جس میں ان کے اعتماد پر پورا اترنے اور پارٹی کی سیٹ پر کامیابی کیلئے شب و روز مصروف ہوں اور میری اس کامیاب الیکشن مہم سے مخالفین بوکھلا گئے ہیں اور پارٹی کی اس یقینی جیت سے گھبرا کر اوچھے ہتھکنڈو پر اتر آئے ہیں ۔میرے اس حلقہ انتخاب میں حالات ماضی سے یکسر تبدیل ہوچکے ہیں لوگ دہشت گردی اور خوف و ہراس سے نکلنا چاہتے ہیں۔