مخالفین کی خواہش پر الیکشن ملتوی کیے گئے، پی پی رہنما



جامشورو (نامہ نگار) 27 دسمبر کو بے نظیر بھٹو کی شہادت کے بعد ہونے والے ردعمل اور جلاؤ گھیراؤ کی وجہ سے سندھ کے مختلف اضلاع میں الیکشن کمیشن آف پاکستان کے دفاتر میں آگ لگانے سے جل گئے اسی بنا پر 8 جنوری کو ہونے والے عام انتخابات 41 دن کے لیے ملتوی ہوئے۔ ضلع میں پی پی پی کے ٹکٹ الیکشن لڑنے والے امیدواروں نے سخت ردعمل کا اظہار کیا ہے اس سلسلے میں رابطہ کرنے پر قومی اسمبلی کے حلقہ 231 جامشورو پیپلز پارٹی کے امیدوار نواب عبدالغنی ٹالپر نے جنگ کو بتایا کہ الیکشن کمیشن آف پاکستان نے مخالفین کی خواہش پر الیکشن ملتوی کیے ہیں جس کی ہم مذمت کرتے ہیں۔ نواب عبدالغنی تالپر نے ایک سوال کے جواب میں کہا کہ محترمہ بے نظیر بھٹو کی شہادت کے سوگ کے دوران پیپلز پارٹی کا کوئی کارکن جلاؤ گھیراؤ اور لوٹ مار میں ملوث نہیں۔ پی ایس 73 جامشورو کے پیپلز پارٹی کے امیدوار سید مراد علی شاہ نے کہا ہے کہ الیکشن ملتوی کرنے کا کوئی جواز نہیں کمپیوٹر کے اس دور میں جلد اہم ریکارڈ دوبارہ حاصل ہو سکتا ہے۔ دوسری جانب ضلع جامشورو کے الیکشن کمشنر شمس جعفری نے رابطہ کرنے پر کہا کہ ہمارا ضلعی دفتر مکمل طور پر تباہ ہوگیا ہے جس کو کسی دوسری جگہ میں منتقل کرنے کے سوا چارہ نہیں ہے ہمیں فوراً متبادل دفتر مل جائے تو دو ہفتے کے اندر آجائیں گے اب 41 دن ہمارے لیے کافی نہیں جبکہ ضلع ناظم ملک اسد سکندر نے رابطہ کرنے پر جنگ کو بتایا کہ ملک خصوصاً سندھ کے دوسرے اضلاع کی نسبت جامشورو ضلع میں اتنا نقصان نہیں ہوا یہاں پر پہلے اور دوسرے دن کے علاوہ امن وامان کی صورتحال بہتر تھی۔ الیکشن کمیشن آف پاکستان کی جانب سے جاری کیے گئے ضابطہ اخلاق اور تبادلوں پر پابندی کے باوجود ضلع جامشورو کے ڈی پی او کو مختلف وجوہات کے سبب ہٹا کر نئے ڈی پی او کا تقرر کیا گیا ہے۔