مختلف واقعات میں2 افراد ہلاک، خاتون اور ایک شخص کی لاشیں ملیں



کراچی (اسٹاف رپورٹر) مختلف واقعات میں2 افراد ہلاک ہوگئے جب کہ خاتون اور ایک شخص کی لاشیں ملی ہیں۔ تفصیلات کے مطابق گلشن معمار ناردرن بائی پاس عباس گوٹھ کے قریب سے30 سالہ نامعلوم شخص کی لاش ملی جو چار روز پرانی ہے۔ پولیس کے مطابق متوفی حادثے میں ہلاک ہوا ہے۔ سعید آباد مشرف کالونی میں کرنٹ لگنے سے25 سالہ نامعلوم نوجوان ہلاک ہوگیا۔ پولیس کے مطابق متوفی بجلی کا تار کاٹ رہا تھا کہ کرنٹ لگ گیا۔ کھارادر صرافہ مارکیٹ کے چوکیدار رفیق اللہ نے ایک راہ گیر غلام محمد کو معمولی تنازع پر فائرنگ سے ہلاک کردیا۔ مقتول کامل گلی کا رہائشی، دو بچوں کا باپ اورموٹرسائیکلوں کی خریدوفروخت کا کام کرتا تھا۔ پولیس نے نامعلوم افراد کے خلاف مقدمہ درج کرلیا ہے۔ دریں اثناء سہراب گوٹھ کے علاقے ایوب گوٹھ کے قریب جھاڑیوں سے30 سالہ نامعلوم خاتون کی لاش ملی جس پر تشدد اور سر پر چوٹ کا نشان تھا۔ مقتولہ نے لال رنگ کی شلوار قمیض پہن رکھی تھی۔ پولیس نے لاش کو شناخت کے لئے ایدھی کے سرد خانے میں رکھوا دیا ہے۔