اسلام آباد(رؤف کلاسرا)گزشتہ ہفتے نوڈیرو میں آصف علی زرداری کی طرف سے اس اشارہ کے بعد کہ پیپلز پارٹی کے بڑے رہنما مخدوم امین فہیم پاکستان کے مستقبل کے وزیراعظم ہو سکتے ہیں، وہ اچانک اسلام آباد کے سفارتی حلقوں کی نظروں میں بے پناہ سیاسی اہمیت اختیارکر گئے ہیں۔ امریکا اور برطانیہ سمیت بہت سے اہم مغربی ممالک کے سفیر دو روز میں پاکستان کے مستقبل کے ممکنہ وزیراعظم سے بند کمرے میں اہم ملاقاتیں کریں گے‘ امریکی ڈیموکریٹ سنیٹر جولبرمین جو کہ کانگریس کی ایک اہم سیاسی شخصیت ہیں اور مسٹر بش کے بہت قریبی ساتھی بھی ہیں،ان دنوں امین فہیم تازہ ترین ایشوز پر بات چیت کے لئے ملاقات کریں گے اسلام آباد میں موجود ایک درجن کے قریب سفارتکاروں نے امین فہیم کو دوپہر کے کھانے اور چائے پر مدعو کیا ہے تاکہ ان سے تفصیلی ملاقات ہو سکے اوریہ جان سکیں کہ وہ محترمہ بے نظیر کی شہادت کے بعد ان کی ترجیحات اور ایجنڈے پر عملدرآمد کے لئے کس طرح منصوبہ بندی کرتے ہیں، توقع ہے کہ یہ سفارتکار اپنی حکومتوں کو متوقع وزیراعظم امین فہیم، اس صورت میں کہ اگرپاکستان پیپلز پارٹی جنرل الیکشن کے بعد دوبارہ اقتدارحاصل کرلیتی ہے، کے بارے میں رپورٹیں بھجوائیں گے تاکہ اپنے پالیسی میکرز کو اس قابل بنا سکیں کہ بے نظیر بھٹو کے بعد وہ مستقبل کے سیاسی اتار چڑھاؤ کو سمجھ سکیں۔ سفارتی حلقوں کو ڈیل کرنیوالے پیپلز پارٹی کے سینیٹر انور بیگ نے بتایا اسلام آباد میں موجود سفیروں کی طرف سے امین فہیم سے ملاقات کیلئے بہت سی درخواستیں موصول ہوئی ہیں۔ یہ سفارتکار مستقبل کے ممکنہ وزیراعظم سے براہ راست ملاقات اور ان کی شخصیت جانچنے کے لئے گہری دلچسپی لے رہے ہیں جنہیں پاکستان میں الیکشن کے بعد ان سے معاملات کرنے کی ضرورت پڑ سکتی ہے۔ مخدوم امین فہیم کی سفارتکاروں سے ان ملاقاتوں کا آغاز آج بدھ سے ہو گا اور جمعرات کی شام تک یہ ملاقاتیں جاری رہیں گی۔ سب سے پہلے وہ کیوبا‘ ارجنٹینا‘ برازیل اور میکسیکو کے سفارتکاروں سے لنچ پر ملاقات کریں گے۔ شام کو ان کی ملاقات امریکی سینیٹر سے طے ہے جو کہ گزشتہ الیکشن میں امریکی وائس پریذیڈنٹ کے عہدے کے امیدوار بھی تھے۔ امین فہیم سے ان کی ملاقات کو اسلام آباد کے سیاسی اور سفارتی حلقوں میں بہت زیادہ اہمیت دی جا رہی ہے کیونکہ بش انتظامیہ میں انہیں اثرورسوخ حاصل ہے۔ اسی طرح جمعہ کو ان کی ملاقاتیں آسٹریلین ہائی کمشنر جاپانی سفیر اور برطانوی ہائی کمشنر سے طے ہیں۔ پاکستان پیپلز پارٹی کی فارن لائیژن کمیٹی کے چیئرمین سینیٹر انور بیگ نے دی نیوز سے گفتگو کرتے ہوئے بتایا کہ ٹاپ کے سفارتکاروں کے ساتھ ملاقاتوں کا یہ سلسلہ ان کی درخواستوں پر شروع ہو رہا ہے جو کہ امین فہیم سے ملنا چاہتے ہیں۔ بیگ نے کہا کہ پریس کانفرنس میں آصف کے واضح اور برملا پیغام نے امین فہیم کو مستقبل کے وزیراعظم کے طو رپر لاکھڑا کیا ہے اور اس بات نے انہیں سفارتی حلقوں کی نظروں میں بہت اہم بنا دیا ہے۔ بیگ نے کہا انٹرنیشنل کمیونٹی بے نظیر بھٹو کی شہادت کے بعد بہت پریشان تھی اور اب وہ جاننا چاہتی ہے کہ پیپلز پارٹی کی فارن پالیسی کیا ہو گی۔ ایک سوال کا جواب دیتے ہوئے مسٹر بیگ نے کہا مسز بھٹو کے وژن سے کسی قسم کا انحراف نہیں کیا جائیگا۔ جہاں تک کہ فارن پالیسی کا تعلق ہے تو انہوں نے بہت صاف رہنمائی فراہم کر دی تھی کہ پاکستان پیپلز پارٹی بیرونی ممالک کیساتھ کس طرح کے روابط رکھے گی۔