مرکزی جماعتوں سے مایوس لوگوں نے بی این پی کو ووٹ دیا
لندن (جنگ نیوز) چرچ آف انگلینڈ کے ایک سینئر بشپ ٹام رائٹ نے کہا ہے کہ بی این پی کو لوگوں نے اس وجہ سے ووٹ دیا کہ وہ مین سٹریم پارٹیوں کی سیاست سے مایوس ہوگئے۔ بشپ آف ڈرہم ریو ٹام رائٹ نے مقامی مذہبی رہنماؤں کی جانب سے انتہا پسند رائٹ ونگ پارٹی کے خلاف موقف اختیار کرنے کو سراہتے ہوئے کہا کہ دوسرے لوگ بھی اس کام میں ان کی مدد کریں۔ اپنے کھلے خط میں ٹام رائٹ نے کہا کہ ہم ان وجوہ سے بخوبی آگاہ ہیں کہ بی این پی اس وجہ سے لوگوں کو متاثر کررہی ہے کہ ہمارے ریجن میں لوگ یہ محسوس کرتے ہیں کہ وہ گذشتہ 30 سال میں قومی سیاست سے مایوسی کا شکار ہیں اور ریگولر مین پارٹیوں سے وابستہ ان کی امیدیں خطرات سے دوچار ہیں لیکن جب بی این پی جیسی جماعت قدم جمارہی ہو تو ہمیں یہ سوال زیر بحث لانا چاہیے کہ یہاں خلا کیوں موجود ہے جو دوسری پارٹیں پر نہیں کررہی ہیں۔ انہوں نے کہا کہ یہ سادہ سی بات نہیں ہے کہ لوگوں پر یہ زور دیا جائے کہ وہ بی این پی کی حمایت نہ کریں۔ بی این پی کے ریجنل آرگنازر کین بوتھ نے کہا کہ بشپ کا اس معاملے سے کوئی سروکار نہیں اگر وہ سیاست میں آنا چاہتے ہیں تو وہ بشپ کا منصب چھوڑ کر سیاستدان بن جائیں۔ کین بوتھ اگلے ماہ ہونے والے لوکل الیکشن میں ایلسوک وارڈ نیو کاسل میں امیدوار ہوں گے۔

__________________