پرویز مشرف نے امریکی سجناں ولوں مایوس ہوون مگروں سعودی عرب کولوں مدد منگ لئی اے۔ خبراں دیون والے اک بھارتی ادارے موجب پرویز مشرف نے اسلام آباد وچ اک اچ پدھری سعودی سفارت کار راہیں سعودی پربندھیاں نوں سنیہا اپڑایا جیہدا جواب وی صدر نوں مل تے گیا ہے پر بوہتا چنگا نہیں ہے۔

وسیلیاں نے دسیا کہ سعودی پربندھی مواخذے دی تحریک نال بنن والی صورتحال نوں ویکھن لئی اک اچ پدھری حکومتی بندہ گھل رہے ہین تے پاکستان وچ سعودی سفیر علی عواض العسیری وی سعودی عرب دا ذاتی دورہ چھڈ کے پاکستان اپڑ رہے ہین۔

وسیلیاں دا آکھنا ہے کہ سعودی پربندھی نواز شریف والی واپری مگروں پاکستان دی گھروکی سیاست توں پریڑے ای رہن نوں چنگا جاندے ہین کیوں جے ملکی تاریخ وچ پہلی واریں میڈیا اتے سول سوسائٹی نے سعودی کردار تے اُنگلاں چُکیاں سن۔

وسیلیاں نے دسیا کہ جے پرویز مشرف استعفیٰ دیندا ہے تے اوہ پکا پکا سعودی عرب وچ وس سکدا اے۔ سعودی پربندھی صدر دی بے عزتی اتے اوہنوں گھپلیاں دے الزاماں توں بچاؤن لئی پناہ دے سکدے نیں۔