لندن …برطانوی وزارت داخلہ نے دارالامرا کے رکن لارڈ نذیر احمد کی طرف سے سابق پاکستانی صدر پرویز مشرف کے بارے میں لکھے گئے خط کا جواب دیتے ہوئے کہا ہے کہ ان کی تشویش پر سنجیدگی سے غور کیا جارہاہے۔دو نومبر کو لکھے گئے خط میں لارڈ نذیر احمدنے زور دیا تھا کہ پرویز مشرف کی برطانیہ میں موجودگی عوامی مفاد میں نہیں ہے۔ خط کے جواب میں پارلیمانی انڈر سیکریٹری نے لارڈ نذیر احمد کولکھا ہے کہ برطانوی وزارتِ داخلہ اور متعلقہ محکموں نے اس معاملے پر غور کیاہے۔انہوں نے کہا کہ وہ کسی انفرادی امیگریشن کیس کو اس طرح زیربحث نہ لانے کے پابند ہیں لیکن یقین دلاتے ہیں کہ سیکریٹری داخلہ ان کے مشوروں اور ان کی طرف سے اٹھائے گئے نکات پر پوری سنجیدگی سے غور کررہے ہیں۔ انہوں نے کہا کہ اگر سیکریٹری داخلہ نے کسی شخص کی برطانیہ میں موجودگی کو عوامی مفاد کے خلاف پایا تو وہ اپنے اختیارات کے تحت اسے ملک بدر کرسکتے ہیں۔
ـــــــــــــــــــــــــ ـــــــــــــ
روزنامہ جنگ۔