مظفر گڑھ:تھر مل پاور میں آئل ٹر ین کے21 ڈبے پٹر ی سے اتر گئے،سپلائی معطل
ملتان(نمائندہ جنگ) کراچی سے واپڈا تھرمل پاور اسٹیشن مظفر گڑھ آنے والی تیل بردار مال گاڑ ی کے 21ڈبے پاور اسٹیشن کے یارڈ میں اچانک پٹری سے اتر گئے، جس سے 400فٹ ٹریک تباہ ہوگیا اور پاور سٹیشن کو تیل کی سپلائی معطل ہوگئی، اطلاع ملتے ہی سمہ سٹہ سے ریلیف ٹرین طلب کرلی گئی، واقعہ اتوار کو دن 12بجے پیش آیا، ڈپٹی ڈویژنل سپرنٹنڈنٹ ریلوے ملتان ڈویژن رمضان شاہ گیلانی نے موقع پر پہنچے اور امدادی کام کی نگرانی کی رات گئے تک امدادی کام جاری تھا، مال گاڑی کے پٹری سے اترنے کی وجہ لائن کا مقررہ حد سے زائد پھیل جانا بتایا جاتا ہے۔دلچسپ امر یہ ہے کہ مال گاڑی کے جو ڈبے پٹری سے اترے ان تقریباً تمام ڈبوں کا اگلا دائیں سمت والا ایک ایک پہیہ پٹری سے اترا، ریلوے حکام نے واقعہ کی تحقیقات کا حکم دے دیا۔

__________________