معاشرے سے منشیات کے خاتمے تک جنگ جاری رہے گی، مکیش چاؤلہ
کراچی (اسٹاف رپورٹر) صوبائی وزیر ایکسائز و ٹیکسیشن مکیش کمار چاؤلہ نے کہا ہے کہ معاشرے سے منشیات کا خاتمہ ہم سب کی اجتماعی ذمہ داری ہے، ہمارے نوجوان منشیات کی لت میں مبتلا ہو رہے ہیں، کہیں کل ہمارا گھر بھی اس آگ کی لپیٹ میں نہ آ جائے۔ ان خیالات کا اظہار انہوں نے منگل کو اپنے دفتر میں طلب کیے گئے اجلاس میں کیا۔ اجلاس میں سیکرٹری ایکسائز محمد نصیر جمالی اور ڈی جی ایکسائز آصف مرغوب صدیقی نے بھی شرکت کی۔ انہوں نے درس گاہوں کے باہر تعلیمی اوقات کے دوران کڑی نگرانی کی ہدایات دیتے ہوئے کہاکہ اگر آج آپ نے منشیات کی بیخ کنی کے لیے ایمانداری سے کام نہ کیا تو کل یہ آپ کے بچوں کو بھی دی جا سکتی ہے۔ ہمیں چاہئے کہ ایمانداری سے منشیات کے خاتمے کے لیے کوششیں کریں۔ انہوں نے کہاکہ مربوط اور جامع حکمت عملی سے کام لے کر منشیات کے خلاف کریک ڈاؤن کی ضرورت ہے۔ انہوں نے کہاکہ معاشرے سے منشیات کے خاتمے تک جنگ جاری رہے گی۔ اجلاس میں صوبائی وزیر کو سیکرٹری ایکسائز نے بتایا کہ ایکسائز پولیس کو 10جدید سہولتوں سے آراستہ موبائلیں فراہم کی جائیں گی جب کہ موٹر رجسٹریشن ونگ کو صوبے کے تمام ریجنل دفاتر اور ہیڈکوارٹر کراچی آفس کو آپس میں آن لائن کر دیا ہے۔ اس کے علاوہ برآمد ہونے والی گاڑیوں کی تفصیلات سے آگاہی کے لیے محکمہ کسٹم سے پہلی دفعہ محکمہ ایکسائز کو آن لائن کیا گیا ہے تاکہ برآمد ہونے والی گاڑی کے کاغذات میں جعل سازی کے امکانات ختم ہو جائیں۔

__________________