معزول ججوں کو انتخابات کے بعد بحال کرنا پڑے گا، جسٹس بھگوان داس



کراچی (جنگ نیوز) سپریم کورٹ کے سابق جسٹس رانا بھگوان داس نے کہا ہے کہ انتخابی نتائج کا شفاف نہ ہونا منتخب نمائندوں کے لئے فائدہ مند نہیں ہوگا۔ ایک انٹرویو میں انہوں نے کہا کہ اگر نتائج میں ہیرا پھیری کی گئی تو یہ عوام‘ ملک اور منتخب نمائندوں کے لئے بھی نقصان دہ ہوگا۔ انتخابات کا التواء ہوہی گیا ہے تو عوام کے حق رائے دہی پر ڈاکہ نہیں پڑنا چاہئے اور ان کو اپنا حق رائے دہی استعمال کرنے کے لئے محفوظ راستہ دینا چاہئے۔ جسٹس رانا بھگوان داس نے کہا کہ ملک میں بروقت انتخابات کا انعقاد آئین کی ضرورت ہے‘ انتخابات میں تاخیر انتہائی غیر معمولی حالات میں ہوسکتی ہے‘ ایمرجنسی کے تحت جو جج معزول کئے گئے ہیں انہیں عام انتخابات کے بعد بحال کرنا پڑے گا تاکہ عدلیہ دوبارہ آئین کے تحت کام کرسکے۔