اسلام آباد (ٹی و ی رپورٹ) اٹارنی جنرل آف پاکستان ملک محمد قیوم نے کہا ہے کہ معزول جج واپس نہیں آسکتے ساری عدلیہ کومصیبت میں ڈالنے والے جسٹس خلیل الرحمن رمدے ہیں اچھی بھلی جھنڈے والی گاڑیوں میں بیٹھتے تھے اب بسوں پر بیٹھنے کی باتیں ہورہی ہیں۔ جیو نیوز سے بات چیت کرتے ہوئے انہوں نے کہا کہ 15 دسمبر کو 73 کا آئین ایک دو ترامیم کے ساتھ بحال ہوجائیگا،آئین بحال ہونے پر پی سی او کے تحت حلف اٹھانے والے ججز دوبارہ حلف اٹھائیں گے، فیڈرل ہائیکورٹ 2 جنوری سے کام شروع کریگی۔ پی سی او کے تحت سبکدوش کئے جانے والے ججوں کوپنشن اور دیگر مراعات دینے کیلئے بھی قانون تیار کر لیا گیا ہے،سپریم کورٹ میں اپنے دفتر میں صحافیوں سے گفتگو کرتے ہوئے اٹارنی جنرل نے کہا کہ رانا بھگوان داس کا یہ کہنا کہ وہ اب بھی سپریم کورٹ کے جج ہیں تو ایسا کہنے میں کیا حرج ہے۔ 99ء میں جو جج فارغ کئے گئے تھے کیا وہ دوبارہ لوٹ کر آئے اب ان کے معاملے میں بھی ایسا ہی ہوگا۔ عدلیہ کو مصیبت میں ڈالنے والے جسٹس خلیل الرحمن رمدے ہیں اب اگر وہ جوڈیشل بسوں پر بیٹھنے کی بات کرتے ہیں تو شوق سے بیٹھیں حکومت نے انہیں جھنڈے والی گاڑی میں بٹھا رکھا تھا۔ انہوں نے کہا کہ پی سی او کے تحت حلف اٹھانے والے ججز کو آئین بحال ہونے پر دوبارہ حلف دینا ہوگا۔ اس موقع پر ملک قیوم نے کہا کہ اپوزیشن چیف الیکشن کمشنر کو نکالنے کا مطالبہ کر رہی ہے جبکہ الیکشن کمشنر کو نکالنے کا وہی طریقہ ہے جس کے تحت ججوں کو نکالا گیا ہے اگر اپوزیشن پی سی او لگا لے توایسا ممکن ہو سکتا ہے۔ انہوں نے کہا کہ قومی حکومت کا مطالبہ انتخابات کو لٹکانے کے لئے کیا جارہا ہے اس کا کوئی فائدہ نہیں۔ اٹارنی جنرل نے بتایا کہ اسلام آباد میں فیڈرل ہائی کورٹ آئندہ ماہ دو جنوری سے اپنا کام شروع کر دے گی۔ انہوں نے کہا کہ صاف و شفاف انتخابات کے حوالے سے حکومت کو لوگ جوتجاویز دے رہے ہیں وہ مان لینی چاہئیں۔

__________________