وزیراعظم شوکت عزیز نے کہا ہے کہ مقامی حکومتوں کا نظام برقرار رہے گا اور کسی کو بھی اسے نقصان پہنچانے کی اجازت نہیں دیں گے، ہم نے عوام کے ووٹ کے ذریعے یہ نظام بڑی کوششوں سے نافذ کیا ہے اور کسی کو بھی اس نظام کو نقصان پہنچانے نہیں دیں گے۔ وہ بدھ کو وزیراعظم ہاؤس میں ساہیوال کے ناظمین کے ایک وفد سے خطاب کر رہے تھے۔ وزیراعظم نے کہا کہ مقامی حکومتوں کا نظام عوام کی مدد اور ان کے مسائل حل کرنے کیلئے بنایا گیا لیکن بعض لوگ اس نظام کو معطل کرنا چاہتے ہیں لیکن ہم ایسا نہیں ہونے دیں گے۔ انہوں نے کہا کہ یہ منفی سوچ ہے، عام انتخابات قریب ہیں اور اس صورتحال میں ضروری ہے کہ ملک کے کونے کونے میں امن و سکون ہو، اس ضمن میں حکومت سیاسی ریلیوں پر بعض پابندیاں لگانے کی تجاویز پر غور کر رہی ہے۔ وزیراعظم نے کہا کہ سیاسی ریلیوں کے موجودہ رجحان سے عوام کیلئے مسائل کھڑے ہوتے ہیں اور زندگی معطل ہو جاتی ہے۔ انہوں نے دہشت گردوں کی طرف سے معصوم لوگوں کو نشانہ بنانے کی مذمت کی۔ انہوں نے کہا کہ مسلم لیگ اور اس کی اتحادی جماعتیں آئندہ انتخابات اپنی کارکردگی کی بنیاد پر لڑیں گی، ملک میں اقتصادی ترقی حکومت کی پالیسیوں سے ممکن ہوئی ہے اور مضبوط معیشت کیلئے پالیسیوں میں تسلسل ضروری ہے۔

بشکریہ
جنگ

__________________