کراچی: سیکریٹری الیکشن کمیشن کنور دلشاد نے آئندہ دو ہفتے میں ملک بھر میں مقامی حکومتوں کی تین سو اکیاون خالی نشستوں پر انتخابات کا اعلان کر دیا۔ کراچی میں جدید ترین کمپیوٹرائز الیکٹرول رول کے افتتاح کے بعد میڈیا سے بات چیت میں انہوں نے کہا کہ جدید کمپیوٹرائز نظام کے لئے مختلف کمپنیوں سے ڈیٹا حاصل کیا گیا ہے اور الیکشن کمیشن کے تیار کردہ اس نظام کی مدد سے کمپیوٹرائز الیکٹرول سسٹم متعارف کرایا جا سکتا ہے۔ جبکہ نتائج مرتب کرنے میں بھی تیزی آئے گی اور یہ نتائج موبائل فون پر بھی دستیاب ہو سکیں گے۔

کنور دلشاد کا کہنا تھا کہ ناظم نواب شاہ سمیت ضلع کونسل کی بارہ‘ تعلقہ ناظم اور نائب ناظم کی بیس سمیت ان تمام نشستوں پر الیکشن کی تیاریاں مکمل کر لی گئی ہیں۔ انہوں نے ایک سوال پر کہا کہ گزشتہ انتخابات پر ملکی اور بین الاقوامی مبصرین‘ سیاسی جماعتوں اور سول سوسائٹی کی رپورٹ موصول ہو چکی ہے۔ ان سفارشات کا بغور جائزہ لیا گیا ہے۔