ملتان میں قاسم بیلہ کے علاقے میں دو خودکش حملوں میں دس افراد جاں بحق اور متعدد زخمی ہوگئے ۔جاں بحق افراد کی تعداد میں اضافے کا خدشہ ہے ۔آج نیوز کے مطابق ملتان میں کینٹ کے علاقے قاسم بیلہ میں دو خودکش حملے کیے گئے جس سے دس افراد جاں بحق اور متعدد زخمی ہوگئے ۔

ممبر صوبائی اسمبلی عامر احمد سعید نے واقعے میں آٹھ افراد کے جاں بحق ہونے کی تصدیق کردی ۔ریسکیو ذرائع نے بتایا ہے کہ دھماکے سے بارہ افراد جاں بحق ہوئے ہیں ۔ دھماکے سے عمارت کا ایک حصہ بھی منہدم ہوگیا ہے اور ملبے تلے متعدد افراد دبے ہوئے ہیں ۔

کمشنر ملتان محمد علی گردیزی نے دھماکوں کو خودکش حملہ قرار دیتے ہوئے اس میں سات افراد کے جاں بحق ہونے کی تصدیق کی ہے ۔ان کا کہنا ہے کہ حملوں میں آٹھ سو سے ایک ہزار کلو گرام بارودی مواد استعمال کیا گیا اور کارروائی میں دو سے چار دہشت گرد وں نے حصہ لیا۔ کمشنر ملتان کا کہنا تھا کہ کارروائی کے دوران حملہ آور نے ایک سے دو راکٹ فائر کیے اور یہ راکٹ روسی ساختہ تھے۔

قاسم بیلہ میں کورکمانڈر کی رہائش گاہ ،ایوی ایشن بیس اور دیگر حساس رہائش گاہیں بھی موجود ہیں ۔ بم دھماکے کے بعد سیکورٹی اہلکاروں نے جائے وقوعہ کو گھیرے میں لے لیا ہے اور زخمیوں کو سی ایم ایچ اور نشتر ہسپتال منتقل کردیا گیا ہے ۔