ملتان :بجلی کی لوڈ شیڈ نگ پر احتجاج جاری ،مظاہر ین ریلوے ٹر یک پر لیٹ گئے،ق لیگ کے خلاف نعر ے
ملتان (نمائندہ جنگ) ملتان میں بجلی کی بندش کے خلاف مظاہروں کا سلسلہ دوسرے روز بھی جاری رہا ،مظاہرین ریلوے ٹریک پر لیٹ گئے جس کے باعث ٹرینوں کی آمد ورفت میں تعطل پیدا ہوگیا جبکہ شہر بھر میں سڑکوں پرٹائر جلائے گئے،جس کے باعث کئی معروف شہراہیں بند ہوگئیں ،میپکو کیخلاف سخت نعرے بازی کے ساتھ مظاہرین کا کہنا تھا کہ کم از کم وزیراعظم کے شہر کو تو بجلی پوری دی جائے۔دوسری جانب میپکو کی سینٹرل ایمپلائز یونین کے ارکان نے بھی پیر کے روز ہونے والے ان پرتشدد اور مظاہرے کے خلاف احتجاجی ریلی نکالی ،میپکو کے مزدور رہنماؤں نے دھمکی دی ہے کہ اگر ان کے خلاف اسی طرح پرتشدد رویہ برقرار رکھا گیا تو وہ ملتان کی مکمل بجلی بند کردیں گے ۔ ریلی کے شرکاء نے ق لیگ اور سٹی ڈسٹرکٹ ناظم کے خلاف نعرے بازی کی اور ان کو ہنگامہ آرائی میں ہونے والی توڑ پھوڑ کا ذمہ دار ٹھہرایا۔ تفصیلات کے مطابق گزشتہ روز ملتان تاجر اتحاد سمیت دیگر تنظیموں نے چوک گھنٹہ گھر ملتان میں ایک احتجاجی مظاہرہ کیا جس کی قیادت تاجر تنظیموں کے نمائندوں زین العابدین ، اختر بٹ اور صوفی عارف نے کی بجلی کی لوڈ شیڈنگ کے خلاف ہونے والے اس مظاہرے میں بڑی تعداد میں لوگوں نے شرکت کی اس دوران چوک گھنٹہ گھر کو ٹریفک کے لئے بلاک کردیا گیا مظاہرین کے ہاتھوں میں بینرز اورکتبے تھے جن پر لوڈ شیڈنگ کے خلاف نعرے درج تھے احتجاجی مظاہرین سے خطاب کرتے ہوئے تاجر تنظیموں کے نمائندوں نے کہا کہ ملتان وزیراعظم کا شہر ہے اس لئے اس شہر میں بجلی کی لوڈ شیڈنگ کا دورانیہ کم کیا جائے۔ انہوں نے پیر کے روز لوڈ شیڈنگ کے خلاف پرتشدد مظاہرے کی مذمت کی اور لوگوں سے اپیل کی کہ وہ ایسے مظاہرے نہ کریں سرکاری املاک کو نقصان نہ پہنچائیں ان نمائندوں کا کہنا تھا کہ سرکاری املاک اور میپکو کے دفتر کا تحفظ پولیس کی ذمہ داری تھی جو انہوں نے پوری نہیں کی انہوں نے حکومت سے مطالبہ کیا کہ وہ بجلی کی لوڈ شیڈنگ کے خاتمے کیلئے جامع حکمت عملی اپنائیں ۔دریں اثناء میپکو کی سنٹرل لیبر یونین کے کارکنوں نے احتجاجی مظاہرہ کیا۔ سینکڑوں کارکنوں نے اپنے دفتر پر مشتعل ہجوم کے ہاتھوں توڑ پھوڑ اور عملہ کو زدو کوب کئے جانے کے خلاف بجلی کی فراہمی منقطع کرنے کی دھمکی دے دی۔ ایمپلائز یونین کے لیڈر اپنے معطل سربراہ کی بحالی، ہجوم کی جانب سے نذر آتش کی گئی گاڑیوں کے معاوضہ کی ادائیگی، حملہ میں ملوث افراد کی گرفتاری کے مطالبا ت کئے۔ ریلی میں مقررین نے ضلعی حکومت اور ضلعی انتظامیہ پر شدید تنقید کی اور الزام عائد کیا کہ اس کی نااہلی کے باعث شرپسند عناصر نے میپکو کو بھاری نقصان پہنچایا۔ قومی املاک کو نقصان پہنچانے والوں کے خلاف سخت کارروائی کی جائے۔ ریلی کے شرکاء نے ق لیگ اور سٹی ڈسٹرکٹ ناظم کے خلاف نعرے بازی کی اور ان کو ہنگامہ آرائی میں ہونے والی توڑ پھوڑ کا ذمہ دار ٹھہرایا۔

__________________