ملتان:ماں نے 3دن سے بھوکے 5بچے فروخت کیلئے پیش کردیئے
ملتان(نمائندہ جنگ)ملتان میں غربت سے تنگ ماں اپنے بچوں کے گلے میں ”برائے فروخت“ کے کتبے لٹکا کر چوک کمہارانوالہ پہنچ گئی‘ پولیس نے تحویل میں لے لیا‘دکھیاری ماں کا کہنا تھا کہ وہ اپنے بچوں کوروز روز بھوک سے مرتا نہیں دیکھ سکتی‘بچوں کوخریدنے والا کم ازکم انہیں کھانا توکھلائے گا،میرے بچے زندہ تو رہیں گے۔ تفصیلات کے مطابق زیڈ ٹاؤن پیراں غائب روڈ کی زرینہ بی بی نے گزشتہ روز اپنے 5 بچوں 10سالہ ریحان اسلم‘ 8سالہ عروج فاطمہ‘4 سالہ اجالا‘ 3 سالہ منیزہ فاطمہ‘ ڈیڑھ برس کے علی حسن کو ہمراہ لیا‘ عروج ‘ ریحان کے گلوں میں بچے برائے فروخت کے کتبے لٹکائے اور چوک کمہارانوالہ آکر بیٹھ گئی ‘ ماں بچوں کو دیکھتے ہی لوگوں کی بڑی تعداد جمع ہوگئی ‘ اطلاع پر پولیس وہاں پہنچ گئی اور ماں بچوں کو اپنی تحویل میں لے لیا‘ وزیراعظم پاکستان کے شہر ملتان کی زرینہ نے بتایا کہ اس کا خاوند ملک اسلم اعوان مزدوری کرتا ہے اور100 روپے مزدوری سے 5 بچوں کا پیٹ پالنا مشکل ہوگیا‘ جبکہ4 روز سے انہیں مزدوری نہ ملی‘ جس سے گھر میں بچا کھچا آٹا اور گھی ختم ہوگیا اور 3روز سے گھر میں کھانا نہیں پکا‘3 دن سے بچے بھوکے ہیں‘ مکان کے کرائے کے ایک ہزار دینے بھی مشکل ہوگئے ہیں‘ رہی سہی کسر مکان کی چھت گرنے سے پوری ہوگئی‘ جس کی زد میں آکر بچے زخمی ہوئے ان کے پاس اتنی رقم نہیں ہے کہ وہ مکان کی چھت دوبارہ تعمیر کرسکیں۔

__________________