ملتان میں لوڈ شیڈنگ کیخلاف عوام کا احتجاج ‘ واپڈا دفتر ‘ بنک نذر آتش‘ پولیس کا لاٹھی چارج‘ 50افراد گرفتار
مشتعل مظاہرین نے کئی گاڑیاں و موٹر سائیکل بھی جلا دئیے ‘ توڑ پھوڑ بھی کی گئی‘ سرکاری املاک کو نقصان پہنچانے والوں کیخلاف سخت کارروائی کرینگے ‘ آئی جی پنجاب
ملتان ۔۔۔۔۔۔ملتان میں بجلی کی لوڈ شیڈنگ کے خلاف سینکڑوں افراد نے احتجاجی مظاہرہ کیا جو بعد میں جلائو گھیرائو اور توڑ پھوڑ کی شکل میں تبدیل ہو گیا‘ مشتعل مظاہرین نے واپڈا کے دفتر اور بنک او ر دیگر کئی موٹر سائیکلوں کو نذر آتش کر دیا‘ پولیس نے سرکاری املاک کو نقصان پہنچانے کے الزام میں 50 سے زائد افراد کو گرفتار کر لیا ہے جبکہ مظاہرین پر لاٹھی چارج کیا گیا اورآنسو گیس کا استعمال بھی کیا گیا۔ پولیس نے مظاہرین کو منتشر کرنے کےلئے لاٹھی چارج کیا ۔ اور آنسو گیس کے شیل فائر کئے جبکہ توڑ پھوڑ اور سرکاری املاک کو نقصان پہنچانے کے الزام میں کئی افراد کو گرفتار کرلیا گیا۔ واضح رہے کہ پیر کی صبح ملتان میں بجلی کی لوڈ شیڈنگ کے خلاف سینکڑوں مشتعل افراد اور محنت کشوں کی بڑی تعداد سڑکوں پر نکل آئی اور توڑ پھوڑ شروع کر دی اور اس دوران جلائو گھیرائو بھی کیا گیا۔ واپڈا کے دفتر‘ بنک کی برانچ او رکئی موٹر سائیکلوں و گاڑیوں کو نذر آتش کر دیا گیا۔ مظاہرین نے ہاتھں میں انڈے اٹھا رکھے تھے اور واپڈا انتظامیہ کے خلاف نعرے لگا رہے تھے۔ انسپکٹر جنرل پولیس پنجاب اظہر حسن ندیم نے کہاکہ ملتان میں گڑ بڑ اور پر تشدد کارروائیوں میںملوث 50 سے زائد افراد کو گرفتار کر کے ان کے خلاف مقدمات درج کر لئے گئے ہیں ۔ انہوں نے کہا کہ ایڈیشنل آئی جی آر پی او ملتان بھاری نفری کے ساتھ موقع پر پہنچ گئے اور انہوں نے صورت حال کو کنٹرول میںکر لیا اور کئی قانون شکن لوگوں کو گرفتار کرلیا گیا ہے۔ ادہر وفاقی وزیر برائے پانی و بجلی راجہ پرویز اشرف نے واقعہ کی مکمل تحقیقات کا حکم دیتے ہوئے کہا ہے کہ میپکو کے چیف آفیسر کو معطل کر دیا ہے۔
٭٭٭٭٭٭٭٭٭٭٭