امریکی حکام نے کہاہے کہ پاکستان کی موجودہ صورتحال کے باعث ہزاروں پاکستانی مہاجرین افغانستان آرہے ہیں۔ مشرقی افغانستان میں امریکی کمانڈر کرنل مارٹن شواوٹزر نے کہا کہ پاک فوج نے دونوں ممالک کی سرحدوں پر واقع اپنی چوکی سے فوج کے ایک چھوٹے دستے کو بھی ہٹادیاہے۔ کابل میں وزارت خارجہ میں صحافیوں سے بات کرتے ہوئے انہوں نے کہا کہ امریکا اس صورتحال میں دلچسپی رکھتا ہے اور اس کا بغور جائزہ لے رہا ہے۔ انہوں نے کہاکہ فوجی کمانڈروں نے اب تک سرحدوں پر کسی قسم کی غیر معمولی نقل وحرکت نہیں دیکھی تاہم اب تک 300 یا 400 خاندان پاکستانی سرحد عبور کرتے ہوئے افغانستان میں داخل ہوچکے ہیں۔افغان صوبے خوست کے گورنر ایرسلا جمال کے ہمراہ مشترکہ ویڈیوپریس کانفرنس سے خطاب کرتے ہوئے امریکی کمانڈر نے کہاکہ اس بات سے ہمیں کوئی ابھرتا ہوا خطرہ محسوس نہیں ہورہا۔ایرسلا جمال نے کہا کہ یہ وہی پاکستانی ہیں جن کے گھروں میں کسی وقت افغان پناہ گزین پاکستان میں‌ رہتے تھے۔ خوست کے گورنر نے کہا کہ ہمیں گذشتہ 10 روز سے اطلاعات ہیں کہ ایک بڑی تعداد میں پاکستان مہاجرین افغانستان آئے ہیں جس کی وجہ موجودہ پاکستانی صورتحال اور پاک فوج اور طالبان کے درمیان جاری لڑائی۔