ملک بھر میں لاکھوں فرزندان توحید 21 ستمبر کی شام مساجد میں اعتکاف بیٹھیں گے
کوئٹہ(زیڈ ایف نیوز) ملک بھر میں لاکھوں فرزندان توحید رمضان المبارک کے آخری عشرے کے آغاز پر 20 رمضان المبارک بروز اتوار بمطابق 21 ستمبر کی شام قبل از نماز مغرب مساجد میں اعتکاف بیٹھیں گے جس کےلئے تمام تر انتظامات مکمل کر لئے گئے ہیں۔ واضح رہے کہ ملک بھر کی تمام مساجد بالخصوص محکمہ اوقاف کے زیر انتظام جامع مساجد کے علاوہ کئی ملکی و بین الاقوامی مذہبی، دینی اور اسلامی تنظیموں نے بھی رواں سال شہر اعتکاف بسانے کا اعلان کیا ہے۔ جہاں ہزاروں کی تعداد میں فرزندان اسلام اجتماعی اعتکاف میں بیٹھیں گے۔ اس موقع پر مذہبی عبادات و دینی فرائض کی سرانجام دہی کےلئے خصوصی انتظامات کئے گئے ہیں جبکہ اعتکاف کے دوران نامور علماء کرام، مشائخ عظام، مذہبی سکالرز، معتکف حضرات کو اسلامی تعلیمات سے تفصیلی روشناس کروائیں گے۔آخری عشرے کے دوران ملک بھر کے حساس علاقوں میں بالخصوص امن و امان کی صورتحال برقرار رکھنے کےلئے محکمہ داخلہ حکومت پاکستان کی ہدایات کی روشنی میں سکیورٹی کے فول پروف انتظامات کو یقینی بنایا گیا ہے جبکہ تمام عبادت گاہوں پر حفاظتی انتظامات سخت کرنے، کلوز سرکٹ کیمروں کی تنصیب سمیت سادہ اور باوردی اہلکاروں کی تعیناتی کے علاوہ گشت کے نظام کو بھی موثر بنایا گیا ہے ۔