لاہور (نمائندہ جنگ) وفاقی وزیر قانون سید افضل حیدر نے کہا کہ قانون کے تحت ملک سے باہر بیٹھ کر عام انتخابات میں حصہ نہیں لیا جا سکتا اور ملک سے باہر رہنے والے کسی امیدوار کے کاغذات نامزدگی منظور نہیں ہو سکتے۔ انہوں نے کہا امیدوار کا ملک میں ہونا ضروری ہے کیونکہ کاغذات نامزدگی جمع کرانے اور سکروٹنی کے وقت امیدوار کی موجودگی لازمی ہے۔ دریں اثناء انہوں نے کہا کہ ملک بھر میں ایمرجنسی اور پی سی او کے خلاف احتجاج کرنے کے خلاف 419 سیاسی کارکن اور 202 وکلاء کی رہائی کے لئے اقدامات شروع کر دیئے گئے ہیں۔ انہوں نے بتایا کہ گزشتہ چار روز کے دوران 5ہزار ایک سو وکلاء اور سیاسی کارکنوں کو جیلوں سے رہا کیا گیا ہے جبکہ اب ملک بھر کی جیلوں میں صرف 621 وکلاء اور سیاسی کارکن باقی رہ گئے ہیں۔ ان کی رہائی کے لئے بھی اقدامات کئے جا رہے ہیں انہوں نے کہا کہ پاکستان کی سیاسی تاریخ میں پہلی بار اتنے کم دنوں میں اتنے زیادہ وکلاء اور سیاسی کارکنوں کو رہا کیا گیا ہے۔

__________________