واشنگٹن (جنگ نیوز)امریکا میں پاکستان کے سفیر محمود علی درانی نے کہا ہے کہ حکومت نے ملک میں جمہوری عمل کی بحالی کا تہیہ کر رکھا ہے اور پاکستان موجودہ صورتحال میں کامیابی سے ہمکنار ہوگا۔ ان خیالات کا اظہار انہوں نے گذشتہ روز اپنے ایک انٹرویو میں کیا انہوں نے کہا کہ ملک میں ایمرجنسی، امن و امان کی خراب صورتحال کے خاتمے، عدلیہ اور انتظامیہ کے درمیان بحران ختم کرنے کیلئے لگائی گئی، تاہم ایمرجنسی انتخابات سے قبل اٹھا لی جائے گی۔ انہوں نے کہا کہ پاکستان کے ایٹمی اثاثے انتہائی محفوظ ہاتھوں میں ہیں۔ ایک سوال کے جواب میں انہوں نے کہا کہ صدر جنرل پرویزمشرف نے ایمرجنسی سے گریز کیا تھا تاہم انہیں ملک میں امن و امان کی خراب صورتحال کے باعث یہ مشکل فیصلہ کرنا پڑا۔

__________________