کراچی(اسٹاف رپورٹر) تحریک انصاف کے سربراہ عمران خان نے کہا ہے کہ اس ملک میں کرپٹ مافیا کی حکمرانی ہے، جس کے باعث جرائم میں اضافہ ہورہا ہے بڑے بڑے ڈاکو اسمبلیوں میں بیٹھے ہیں اور غریب عوام جیلوں میں سڑ رہی ہے، اقتدار میں آئے تو تمام بڑے سیاستدانوں کی بیرون ملک میں چھپی دولت واپس لائینگے۔ انہوں نے کہا کہ ڈرون حملے بین الاقوامی قانون کی کھلی خلاف ورزی ہیں، حملے بند نہ ہوئے تو نیٹو کی سپلائی لائن کو 50سے زائد جگہ سے بند اور کراچی کے شہری بھی اسلام آباد کا رخ کریں گے۔ جمعہ کی شب یہاں گرین ٹاؤن میں پارٹی کے جلسے سے خطاب کرتے ہوئے عمران خان نے کہا کہ ہماری جماعت ملک میں بڑی تبدیلی لانے کیلئے نکلی ہے اور اس کیلئے جدوجہد جاری ہے، صومالیہ میں بحری قزاقوں کی قید میں پاکستانیوں کیلئے حکومت نے کچھ نہیں کیا۔ اس موقع پر تحریک انصاف سندھ کے صوبائی رہنما عارف علوی سمیت دیگر رہنما بھی موجود تھے۔ انہوں نے کہا کہ اقتدار میں آئے تو کراچی میں سیاسی بنیادوں پر پولیس بھرتی کے نظام کا خاتمہ کرینگے جس کے بعد پولیس کا اتنا مؤثر ادارہ بن جائیگا کہ مجرم اگر تحریک انصاف کا ہو، متحدہ قومی موومنٹ، پیپلزپارٹی یا کسی اور جماعت کا، اسے گرفتار کیا جائیگا جس کے بعد کراچی میں رینجرز کی ضرورت محسوس نہیں کی جائیگی۔عمران خان کا کہنا تھا کہ اقتدار میں آئے تو ایسا تعلیمی نظام بنائیں گے کہ بیرون ملک سے لوگ یہاں پڑھنے آئینگے۔انہوں نے کہا کہ اقتدار میں آنے کے بعد کھیلوں کے حوالے سے بھی خود پالیسی مرتب کروں گا، اس بار کا ورلڈ کپ تو ہار گئے لیکن آئندہ کوئی ورلڈ کپ نہیں ہارینگے۔قبل ازیں جلسے سے خطاب کرتے ہوئے تحریک انصاف سندھ کے رہنما عارف علوی کا کہنا تھا کہ کراچی 20سال سے جل رہا ہے جس کے ذمہ دار حکومت کے اتحادی ہیں۔انہوں نے کہا کہ ملک میں موجود ہ حکمرانوں میں سب سے بہتر عمران خان ہے جبکہ پیپلزپارٹی کی قیادت کیلئے آصف علی زرداری سے بھی بہتر لوگ پارٹی میں موجود ہیں۔
جنگ

__________________
لا فتی الا علیّ لا سیف الاّ ذوالفقار