آرمی چیف باری باری 3-3سال کیلئے ملک کے سربراہ ہوں گے، سیاست کاخاتمہ ہوجائے گا

آصف زرداری سمیت کسی کی زر کام نہیں آئےگی، نواز شریف کو قبر کی جگہ مل جائے تو بڑی بات ہوگی

صرف جنازے اور نکاح پڑھانے کیلئے بچیں گے، کنگری ہاﺅس میں پریس کانفرنس

کراچی(نمائندہ جنگ) حُروں کے روحانی پیشوا اورپاکستان مسلم لیگ (فنکشنل) کے سربراہ پیر پگارا نے کہا ہے کہ ملک میں تیس چالیس سال تک ڈسپلنڈ (Disciplined) ڈکٹیٹر شپ قائم ہوگی اس کا اپنا آئین ہوگا چیف آف آرمی اسٹاف باری باری تین تین سال کےلئے ملک کے سربراہ ہوں گے ملک سے سیاست کا خاتمہ ہو جائے گا۔ آصف زرداری سمیت کسی کی زر بھی کام نہیں آئے گی۔ نواز شریف اوردیگر کو قبریں مل جائیں تو بڑی بات ہوگی۔ سب مولوی مارے جائیں گے۔ مولوی اسلام مسلمانوں اورمسجدوں کیلئے خطرہ ہیں وہ ملااپنے آپ سے باہر نکل گئے ہیں۔ صرف جنازے پڑھانے اور نکاح کیلئے ملاّ بچیں گے۔ فوج ملک اورعوام کو بچانے کیلئے آئے گی۔ ملک سے بدمعاشی، لوٹ مار، چوری چکاری ، ڈی ایمپلائمنٹ ختم ہو جائے گی۔ یہی وجہ ہے کہ قوم اور بین الاقوامی قوتیں واہ واہ کریںگی۔ ان خیالات کااظہار انہوں نے منگل کو اپنی رہائش گاہ کنگری ہاﺅس پر پریس کانفرنس سے خطاب کرتے ہوئے کیا۔ پیر پگارا نے کہاکہ تمام جرنیل محب وطن ہیں ۔ فوج جان بچانے کیلئے آرہی ہے۔مارچ ضرور ہوگا عوام اس کاساتھ دے گی۔ حکمران بھاگ نہیں سکیں گے۔ چور لٹیرے مارے جائیں گے۔ جو بچیں گے وہ شکرمند ہوں گے۔ میرا بیان حکومت کے نہیں پورے ملک کے خلاف ایف آئی آر ہے۔ ضرورت پڑی تو 40,30برس کے بعد انتخابات ہوں گے۔ میں مارشل لاءلگانے کی نہیں ملک بچانے کی بات کرتا ہوں۔ پیر پگارا نے کہاکہ اگر ہماری فوج شروعات میں ماردھاڑ شروع کرتی تو ہلاکو خان اور چنگیز خان کی فہرست میںآجاتی ۔ ملامسلمانوں کیلئے خطرہ ہیں۔ ہرجرنیل محب وطن ہوتا ہے۔ ہم انقلاب کے کتنے قریب ہیں یہ اللہ ہی جانتا ہے تاہم بیرونی طاقتیں اس کی تائید کریںگی انہوں نے کہاکہ میںڈرانہیں رہا۔ ہم لیبیا کی طرح نہیں بلکہ ڈسپلن ڈکٹیٹر شپ کی طرف جارہے ہیں فوج سے جان چھڑانے کی کیا ضرورت ہے۔ وہ آپ کی جان بچانے کیلئے آرہی ہیں عوام فوج کاساتھ دے گی۔ مسلم لیگ اکٹھی ہو یا نہ ہو کوئی فرق نہیں پڑتا۔ دعا کریں کہ اللہ نواز شریف کوسندھ تک آنے کا وقت نہ دے۔ ایک سوال کے جواب میں پیر پگارا نے کہاکہ حکمرانوں سمیت کوئی بھی بھاگ نہیں سکے گا۔ بھاگنے کی کوشش کرنے والوں کوہم پولو کے گھوڑوں کی مدد سے پکڑ لیں گے۔ ایک اورسوال کے جواب میں انہوں نے کہاکہ صدرآصف زرداری کوزرنصیب نہیں ہوگا۔ ان کے صاحبزادے بلاول کی پیدائش سے قبل ہی میں نے کہہ دیا تھا کہ وہ مسلم لیگ میں شامل ہوں گے تاہم جب مسلم لیگ ہی نہیں ہوگی تو اس کاکیا ذکر سابق صدرپرویز مشرف کے حوالے سے سوال پر انہوں نے کہاکہ جنرل (ر) مشرف کے خلاف پاکستان میں مقدمے ہیں۔ وہ کامن سینس رکھتے ہیں۔ اورملک سے باہرہی رہیں گے۔ ریمنڈ ڈیوس کے حوالے سے سوال کے جواب میں پیر صاحب پگارا نے کہاکہ اس کے معاملے کیلئے عدالتیں موجود ہیں چوہدری برادران کے حوالے سے سوال کے جواب پر انہوں نے کہاکہ ان کی چوریوں پرکتاب لکھی جا سکتی ہے۔

روزنامہ جنگ راولپنڈی

__________________

(وَقُل رَّبِّ ارْحَمْهُمَا كَمَا رَبَّيَانِي صَغِيرًا) اے میرے رب جس طرح انہوں نے مجھے بچپن سے پالا ہے اسی طرح تو بھی ان پر رحم فرما۔ (الاسراء: 23)