ملک کو سیکولر بنانے کی سازش کامیاب نہیں ہوگی،سراج الحق
کراچی(پ ر) جماعت اسلامی صوبہ سرحد کے امیر وسابق سینئر صوبائی وزیر سراج الحق نے کہا ہے کہ قبائلی پُرامن لوگ ہیں گولیاں برسائی گئیں تو یہ ملکی سلامتی کے منافی اقدام ہوگا۔ پاکستان اسلام کا قلعہ ہے سکولر بنانے کی سازش کامیاب نہیں ہونے دی جائے گی۔ان خیالات کااظہار انہوں نے اتحاد ٹاؤن میں معززین کے ہمراہ ایک نشست سے خطاب کرتے ہوئے کیا۔اس موقع پر ان کے ہمراہ سابق رکن قومی اسمبلی لیئق خان،سابق رکن صوبائی اسمبلی وجماعت اسلامی ضلع غربی کے امیر حمید اللہ خان ایڈووکیٹ،حاجی فضل رزاق اور دیگر رہنما بھی موجود تھے۔سراج الحق نے خطاب کرتے ہوئے مزیدکہا کہ پرویز مشرف کی امریکا نواز پالیسیوں کی وجہ سے آج ملک تباہی کے دہانے پر کھڑا ہے مگر بدقسمتی یہ ہے کہ 18فروری کے انتخابات کے نتیجے میں منتخب ہونے والے بھی آج اس پالیسی پر عمل پیرا ہیں جس کی وجہ سے پورا ملک سیاسی بے یقینی اور عدم استحکام کا شکار ہوا ہے۔انہوں نے کہا کہ قبائلی عوام پُرامن لوگ ہیں ان کی پوری تاریخ اسلام اور حب الوطنی سے عبارت ہے۔انہوں نے کہا کہ آپریشن اور طاقت کا استعمال مسئلے کا حل نہیں اگر معاملات افہام وتفہیم سے حل کرنے کی کوشش نہ کی گئی تو صورت حال مزید خراب ہوجائے گی۔

__________________