ملک کی بہتری کیلئے متحدہو گئے،بینظیر کے ساتھ ماضی کی مخالفت بھلا دی،نواز شر یف



مظفرآباد (نمائندگان جنگ)سابق وزیر اعظم پاکستان میاں نوازشریف نے کہا ہے کہ وہ پاکستان کے عوام کی مدد سے ملک بچائیں گے،انہوں نے کہا کہ بے نظیر کے ساتھ ماضی کی مخالفت بھلادی ہے اور اب ملک کی بہتری کیلئے متحد ہو گئے ہیں،مظفر آباد میں ایک بڑے جلسہ عام سے خطاب کرتے ہوئے انہوں نے کہا کہ 73ء کے آئین کی بحالی اور عدلیہ و میڈیا کی آزادی اولین ترجیح ہے، موجودہ صورتحال کے حوالے سے انہوں نے کہا کہ ملک کو خاتمے کی طرف دھکیلا جارہا ہے ، سابق وزیر اعظم جب ایک روزہ دورے پر آزاد کشمیر پہنچے تو انہیں پندرہ سو سے زائد گاڑیوں کے جلوس کے ہمراہ کوہالہ سے مظفرآباد لایا گیا۔پھولوں کے ہارپہنائے گئے، راستے میں جگہجگہ لوگوں نے میاں نوازشریف کا استقبال کیا۔ اس موقع پر خطاب کرتے ہوئے انہوں نے کہا کہ پرویز مشرف اقوام متحدہ کی قراردادوں سے انحراف اور تقسیم کشمیر کی سازش میں ملوث ہیں،انہوں نے کہا کہ زلزلہ زدہ علاقوں کی حالت زار دیکھ کر افسوس ہوا ہے۔ ان علاقوں کی بحالی کے لئے گزشتہ دو سالوں سے کوئی اقدام نہیں کیا، زلزلہ کے بعد پاکستان آنا چاہتا تھا لیکن مجھے اپنے مصیبت زدہ بھائیوں کی مدد کیلئے نہیں آنے دیا گیا۔ انہوں نے کہا کہ جرنیلوں نے پہلے بھی ملک توڑا، پاکستان کے منتخب وزیر اعظم کو پھانسی پر لٹکایا، پہلے وزرائے اعظم کو اقتدار سے محروم کرنے کی روایت تھی لیکن اب عدلیہ کو بھی معطل کردیا گیا، ملک کو خاتمے کی طرف دھکیلا جارہا ہے لیکن اس ملک کو ہم آپ لوگوں کے ساتھ مل کر بچائیں گے۔ قبل ازیں مری سے مظفرآباد روانگی کے وقت جھیکا گلی چوک میں جلسہ عام سے خطاب کرتے ہوئے نواز شریف نے کہا کہ ملک میں مہنگائی، بے روزگاری، افراتفری، قتل و غارت اور لاقانونیت کا عذاب ہے، نوجوانوں کے پاس ڈگریاں ہیں لیکن ان کو پوچھنے والا کوئی نہیں، گزشتہ آٹھ سال میں ملک اوپر جانے کی بجائے پیچھے آیا ہے، انہوں نے کہا کہ 12 اکتوبر 1999 کو جنرل مشرف نے یہ کہہ کر میری حکومت ختم کی تھی کہ پاکستان ناکام ریاست بن گیا ہے جس کو بچانے کیلئے میں نے اقتدار سنبھالا ہے لیکن آٹھ سال بعد انہیں دوبارہ اپنی ہی حکومت کے خلاف ایمرجنسی نافذ کر کے ناکام ریاست بنا لیا ہے۔معصوم لوگوں کو ان باتوں کا پتہ نہیں، لوگ سمجھیں اور ملک بچانے کیلئے آگے بڑھیں،انہوں نے کہا کہ لال مسجد اور قبائلی علاقوں میں معصوم اور یتیم لوگوں کو شہید کیا گیا، لال مسجد میں بچے بالاکوٹ اور مظفرآباد سے آئے ہوئے تھے، ہیلی کاپٹر سے بمباری ہو رہی ہے اور امریکہ کے کہنے پر یہ سب کچھ کیا جا رہا ہے، انہوں نے کہا کہ مجھے پانچ بار امریکہ نے کہا تھا کہ ایٹمی دھماکے نہ کرو لیکن میں نے ان کی نہیں عوام کی سنی اور ملک کو ایٹمی قوت بنایا،کیونکہ میں صرف اپنی قوم کی بات سنتا ہوں۔انہوں نے کہا کہ پاکستان کو بچانے کا وقت ہے عوام میرے کندھے سے کندھا ملا کر چلیں اگر ہم آج ملک کو بچانے کیلئے نہ نکلے تو پھر ہاتھ ملتے رہیں گے اور خدانخواستہ پاکستان ہاتھوں سے نکل جائے گا۔اس موقع پر مری کے سیکڑوں لوگوں نے میاں نواز شریف کا بھرپور استقبال کیا، اس موقع پر شدید نعرہ بازی کی گئی۔انہوں نے مظفرآباد میں دربار سائیں سہیلی پر حاضری دی اس موقع پر لوگوں کی بڑی تعداد جمع ہو گئی،انہوں نے زلزلے میں جاں بحق ہونے والوں کے لئے فاتحہ خوانی کی۔