ملک کی داخلی خارجی صورتحال پر غور کیلئے پارلیمنٹ کا مشترکہ اجلاس کل ہوگا
اجلاس کے ایجنڈا کو حتمی شکل دیدی گئی ، اجلاس میں اراکین پارلیمنٹ کو ملکی سلامتی کو درپیش خطرات کے حوالے سے اعتماد میں لیاجائے گا، نوازشریف خصوصی دعوت پر شرکت کریں گے، میڈیا کو کوریج کی اجازت نہیں ہوگی، پارلیمنٹ ہائوس کی سکیورٹی کیلئے خصوصی انتظامات
اسلام آباد ………… ملک کی موجودہ داخلی وخارجی صورتحال اور ملکی سلامتی کو درپیش خطرات پر غور اور ارکان پارلیمنٹ کو اعتماد میں لینے کیلئے پارلیمنٹ کا مشترکہ ’’ان کیمرہ‘‘ اجلاس کل بدھ کی شام پانچ بجے پارلیمنٹ ہائوس میں ہوگا۔ سپیکر قومی اسمبلی ڈاکٹر فہمیدہ مرزا اجلاس کی صدارت کریں گی۔ قومی اسمبلی سیکرٹریٹ نے اجلاس کیلئے تمام انتظامات کو حتمی شکل دے دی ہے جبکہ سپیکر قومی اسمبلی نے وزیراعظم کی مشاورت سے اجلاس کا ایجنڈا تیار کرلیا ہے۔ منگل کو قومی اسمبلی سیکرٹریٹ میں اعلیٰ سطحی اجلاس کے دوران مشترکہ اجلاس کے انتظامات اور خاص طورپر سکیورٹی کو فول پروف بنانے کیلئے اقدامات کو حتمی شکل دی گئی ، اجلاس میں اراکین پارلیمنٹ کو داخلی اور خارجی صورتحال سمیت ملکی سلامتی کو درپیش خطرات کے حوالے سے اراکین کو اعتماد میں لیاجائے گا۔ اراکین پارلیمنٹ یا ایجنڈے کے حوالے سے مدعوئین کے علاوہ کسی کو اجلاس میںشرکت کی اجازت نہیں ہوگی۔ فوج کے ڈائریکٹر جنرل ملٹری آپریشن میجر جنرل احمد شجاع پاشا اور دیگر سکیورٹی اداروں کے سربراہان داخلی دہشت گردی، قبائلی علاقوں میں آپریشن کے بارے میں بریفنگ دیں گے اور وہ اس حوالے سے ارکان پارلیمنٹ کے سوالات کے جواب بھی دیں گے۔ مسلم لیگ (ن) کے قائد اور سابق وزیراعظم میاں نوازشریف وزیراعظم یوسف رضا گیلانی کی خصوصی دعوت پر اجلاس میں شرکت کریں گے۔ پارلیمنٹ کے ان کیمرہ مشترکہ سیشن کے موقع پر تمام اراکین سینٹ وقومی اسمبلی کو ہدایت کی گئی ہے کہ وہ اجلاس میں بروقت شرکت کو یقینی بنائیں۔ قومی اسمبلی ہال کے دروازے ٹھیک پانچ بجے بند کردیئے جائیں گے۔ اس کے بعد کوئی رکن اندر سے باہر یا باہر سے اندر نہیں آسکے گا۔ قومی اسمبلی سیکرٹریٹ اور سینٹ سیکرٹریٹ کے ذرائع کے مطابق پاکستان پیپلزپارٹی کے چیف وہپ وفاقی وزیر محنت وافرادی قوت سید خورشید شاہ اور مسلم لیگ (ن) کے چیف وہپ شیخ آفتاب احمد سینٹ میں حکومتی چیف وہپ مولانا عبدالغفور حیدری، مسلم لیگ مسلم لیگ (ق) کے قومی اسمبلی میں چیف وہپ ریاض حسین پیرزادہ اور سینٹ میں اپوزیشن لیڈر کامل علی آغا سے کہا گیا ہے کہ وہ اپنے اپنے اراکین کی پارلیمنٹ کے ان کیمرہ مشترکہ سیشن میں بروقت شرکت کو یقینی بنائیں قومی اسمبلی ہال کے دروازے ٹھیک پانچ بجے بند کردیئے جائیں گے جو اراکین مقررہ وقت سے قبل پارلیمنٹ ہائوس میں نہ پہنچے یا اندر آنے سے رہ گئے وہ کسی صورت اندر داخل نہیں ہوسکیں گے۔ دریں اثناء وزارت پارلیمانی امور کے مشیر اظہار امروہوی نے میڈیا سے گفتگو کرتے ہوئے کہا کہ صدرمملکت کو آئین کے آرٹیکل 54 کے تحت یہ اختیار حاصل ہے کہ وہ کسی بھی قومی نوعیت کے معاملے پر پارلیمنٹ کا مشترکہ اجلاس طلب کرسکتے ہیں۔ایک سوال کے جواب میں انہوں نے کہا کہ یہ ضروری نہیں ہے کہ پارلیمنٹ کا ’’ان کیمرہ‘‘ سیشن ایک دن کے لئے ہو۔ اس کی مدت میں معاملات کی نوعیت کے حوالے سے اضافہ ہوسکتا ہے۔ ممکن ہے کہ اجلاس آئندہ دوچار روز تک جاری رہے ۔ انہوں نے کہا کہ اس اجلاس کی صدارت قواعدوضوابط کے تحت سپیکر قومی اسمبلی کرتا ہے۔ تاہم اگر سپیکر موجود نہ ہو تو چیئرمین سینٹ اجلاس کی صدارت کرتا ہے دونوں کی عدم موجودگی میں ڈپٹی سپیکر اور ڈپٹی چیئرمین سینٹ کو اجلاس کی صدارت کا اختیار حاصل ہوتا ہے۔ ایک سوال کے جواب میں انہوں نے کہا کہ اس اجلاس کا ایجنڈا سپیکر قومی اسمبلی اور وزیراعظم کی باہمی مشاورت سے تشکیل دیا جائے گا۔ ایجنڈے کے حوالے سے انہوں نے امکان ظاہر کیا کہ ملک کی داخلی اور خارجی صوتحال سمیت ملکی سلامتی کودرپیش خطرات کے حوالے سے اراکین پارلیمنٹ کو اعتماد میں لیا جائے گا۔ سپیکر قومی اسمبلی کی جانب سے وزیرخارجہ شاہ محمود قریشی، مشیر داخلہ رحمن ملک یا ملک کی انٹیلی جنس ایجنسیوںکے حکام میں سے جس کو بھی اجازت دی جائے گی وہ اراکین کو بریفنگ دیں گے۔ قومی اسمبلی سیکرٹریٹ کے ذرائع کے مطابق پارلیمنٹ کے مشترکہ سیشن کے موقع پر سخت ترین حفاظتی اقدامات کئے گئے ہیں اور امن وامان قائم رکھنے والے اداروں کو ’’ہائی الرٹ‘‘ رہنے کی ہدایت جاری کی گئی ہیں۔ اس موقع پر ’’ان کیمرہ‘‘ اجلاس ہوگا۔ میڈیا کو کوریج کی اجازت نہیں ہوگی۔