ٹورنٹو( نمائندہ جنگ) کینیڈا میں روز نامہ ” جنگ “ کے نمائندے، ممتاز شاعر، صحافی اور بیرون ملک مقیم پاکستانیوں کے مسائل حل کروانے میں پیش پیش ارشد عثمانی 58 سال کی عمر میں بدھ کی دوپہر ٹورنٹو کے ایک اسپتال میں انتقال کر گئے ۔ جہاں وہ گزشتہ تین ماہ سے زیر علاج تھے ، ان کے پسماندگان میں ان کی اہلیہ، دو صاحبزادے اور ایک صاحبزادی شامل ہیں، ٹورنٹو میں مقیم پاکستانی ادیبوں، دانشوروں، سیاسی کارکنوں تاجروں اور صنعتکاروں نے انتہائی غم و اندوہ کا اظہار کیا ہے ۔ مرحوم ارشد عثمانی کینیڈا کی پاکستانی برادری میں بہت مقبول تھے، اکثر تقریبات میں وہ نظامت کرکے سامعین کے دل موہ لیتے تھے۔ بنیادی طور پر ایک نیکار ارشد عثمانی نے کراچی سے اپنی عملی زندگی کا آغاز کیا ، دوبئی میں بھی کئی سال وہ بینکنگ سے وابستہ رہے گزشتہ بیس سال سے زیادہ عرصے سے وہ کینیڈا میں مقیم تھے اور پاکستانی برادری کی خدمت میں آگے آگے رہتے تھے۔ان کے انتقال پر نیشنل بینک آف پاکستان ( کینیڈا) کے رسول احمد کلیمی اردو مجلس کے اشفاق حسین، قاری آصف قاسمی نے مرحوم کی خدمات کو قابل قدر قرار دیتے ہوئے کہا ہے کہ ان کی ناگہانی موت سے پاکستانی برادری میں ایک ایسا خلا پیدا ہوگیا ہے جسے برسوں تک پر نہیں کیا جاسکے گا