بغداد :23 دسمبر عراقی صحافی کے بھائی عودے الزیدی نے کہا ہے کہ منتظر الزیدی پر تشدد کر کے زبردستی وزیر اعظم کے نام معافی نامہ لکھوایا گیا ہے اور ان کے بھائی نے انہیں بتایا ہے کہ بش کو جوتا مارنے پر اسے کوئی افسوس نہیں اور موقع ملا تو وہ دوبارہ ایسا کرے گا ۔ عودے الزیدی نے کہا کہ منتظر الزیدی پر شدید تشدد کیا گیا اس کے دانت توڑ دیئے گئے اور کان سگریٹ سے داغے گئے ۔ انہوں نے بتایا کہ منتظرکو لوہے کی سلاخوں سے بھی مارا گیا ۔ منتظر الزیدی نے ملاقات میں اپنے بھائی کو بتایا کہ جیلر نے انہیں برہنہ کر کے ٹھنڈے پانی سے تشدد کیا ۔ عودے کا کہنا ہے کہ اس کے بھائی کے چہرے جسم اور ہاتھوں پر تشدد کے واضح نشان تھے ۔ عودے کے مطابق مقدمے کی سماعت 31 دسمبر کو شروع ہو گی ۔ واضح رہے کہ منتظر الزیدی نے امریکی صدر جارج ڈبلیو بش پر جوتے برسائے جس کے باعث انہیں حراست میں لے لیا گیا تھا اور انہیںغیر ملکی سربراہ پر تشدد کے الزام میں 2 سال قید کی سزا ہو سکتی ہے ۔