اسلام آباد (جنگ نیوز) صدر پرویز مشرف نے واضح کیا ہے کہ وہ پارلیمنٹ کی بالادستی کو تسلیم کرتے ہیں اور اس کا فیصلہ قبول کریں گے، پارلیمنٹ انکے خلاف مواخذے کی تحریک لانے میں آزاد ہے تاہم وہ جمہوری عمل کی حمایت جاری رکھیں گے۔ جمعہ کو صدارتی کیمپ آفس میں مسلم لیگ (ق) کے صدر چوہدری شجاعت حسین اور چوہدری پرویز الٰہی کے ساتھ بات چیت کرتے ہوئے صدر پرویز نے کہا کہ پارلیمنٹ ایک ایک خود مختار ادارہ ہے اور وہ خود بھی اس کا حصہ ہیں اور پارلیمنٹ کے فیصلوں کو تسلیم کرینگے ۔ انہوں نے بجٹ پر بحث کے دوران اپوزیشن کے کردار کی تعریف کی اور مسلم لیگ ق کی قیادت کے فیصلوں کو سراہا اور کہا کہ اس وقت ملک کو محاذآرائی کی نہیں سیاسی مفاہمت کی ضرورت ہے اور اس کے لئے سب کو اپنا کردار ادا کرنا ہے جبکہ وہ ملک میں پارلیمانی روایات کو مضبوط دیکھنا چاہتے ہیں ۔ذرائع کے مطابق چوہدری برادران نے صدر کو یقین دلایا کہ ان کے خلاف مواخذے کی تحریک آئی تو وہ اپنے اتحادیوں کے ساتھ مل کر اس کی بھرپور مخالفت کرینگے ۔پرویز الٰہی نے صدر کو بتایا کہ پارلیمنٹ میں ان کی سیاست ڈیسک بجانے اور واک آوٹ کی نہیں ہے اپوزیشن اس بار ماضی کی اپوزیشن کی بجائے تعمیری اور مثبت کردار ادا کررہی ہے ۔ ملاقات میں ججز کی بحالی ،سیاسی صورت حال ،بجٹ اور صدر کے مواخذے سے متعلق امور اور حکومتی اتحاد کے معاملات بھی زیر بحث آئے۔