موجودہ انتخابات سے عوام کوکچھ نہیں ملے گا، جسٹس (ر) وجیہہ الدین



کراچی (اسٹاف رپورٹر) سپریم کورٹ آف پاکستان کے (ر) جسٹس وجیہہ الدین نے کہا ہے کہ آئین کی پامالی درحقیقت سب سے بڑا قومی سانحہ ہے۔ انتخابات میں حصہ لینے والے قوم کے مفادات کو پس پشت ڈال کر اپنی جیب اور کرسی کے لیے سوچ رہے ہیں، موجودہ انتخابات سے عوام کو کچھ نہیں ملے گا۔ صدر کیلئے4 ارب روپے کا طیارہ قومی خزانے پر بوجھ کے مترادف ہے۔ پاسبان کا کردار اندھیرے میں روشنی ہے، منظم نوجوان ہی ملک کی ڈوبتی ناؤ کو کنارے پر لگا سکتے ہیں۔ وہ اپنی رہائش گاہ پر پاسبان پاکستان کے صدر الطاف شکور کی قیادت میں آنے والے پاسبان رہنماؤں کے وفد سے گفتگو کر رہے تھے۔ ایک اعلامیے کے مطابق وفد میں پاسبان پاکستان کے جنرل سیکریٹری عثمان معظم، پاسبان کراچی کے صدر سید اشرف حسین، پاسبان پریس انفارمیشن سیل کے انچارج اعظم منہاس، زونل آرگنائزر عبدالحاکم قائد، نعیم شیخ اور سردار ذوالفقار بھی شامل تھے۔ الطاف شکور نے کہا کہ سانحہ راولپنڈی فعال عدلیہ نہ ہونے کا شاخسانہ ہے۔ پاسبان ظلم کے خلاف مظلوموں کی آواز اور موٴثر قوت ہے۔ جسٹس (ر) وجیہہ الدین نے کہا کہ حکومتوں کی جانب سے قدم قدم پر آئین کی پامالی ہی درحقیقت سب سے بڑا قومی سانحہ ہے۔ ججز ، وکلا، صحافی، سیاسی وسماجی رہنما اور سول سوسائٹی کی تحریک نشیب وفراز سے گزرکر کامیابی کی منزل کی جانب گامزن ہے۔ وکلا قوم کے ہیرو ہیں، کچھ سیاسی لوگوں نے بحالی ٴ آئین و عدلیہ تحریک میں مایوس کن کردار ادا کیا ہے۔ انتخابات میں حصہ لینے والے بہت سے عناصر قوم کے وسیع تر مفادات کے برعکس محض اپنی جیب اور کرسی کے لیے سوچ رہے ہیں جو افسوسناک بات ہے۔