لاہور ہائی کورٹ میں مسلم لیگ نون کے سربراہ میاں نواز شریف کی ضمنی انتخاب کے لیے اہلیت کے فیصلے اور شہباز شریف کی بلامقابلہ کامیابی کے نوٹیفیکشن کو چیلنج کردیا گیا ہے۔
چیف جسٹس لاہور ہائی کورٹ نے اس کیس کی ابتدائی سماعت کے لیے تین رکنی بنچ تشکیل دیا ہے۔

لاہور ہائی کورٹ میں یہ تین مختلف رٹ درخواستیں ایک عام شہری خرم شاہ اور ایک آزاد امیدوار نورالہی کی جانب سے دائر کی گئی ہیں۔

درخواست دہندگان کے وکیل ڈاکٹر ایم محئی الدین قاضی نے بی بی سی کو بتایا کہ انہوں نے الیکشن ٹریبونل اور چیف الیکشن کمیشن کے ان فیصلوں کو چیلنج کیا ہے جن کے تحت نواز شریف اور شہباز شریف کے کاغذات نامزدگی کو درست قراردیا گیا تھا۔

نواز شریف نے لاہورکے حلقہ این اے ایک سو تئیس سے جبکہ شہباز شریف نے لاہور کے دوحلقوں سمیت پنجاب بھر سے پانچ حلقوں سے صوبائی نشست کے لیے کاغذات جمع کرائے تھے۔

انتخابی عذرداریاں سننے والے الیکشن ٹریبونل کے دونوں ججوں نے الگ الگ کیسوں میں شریف بردران کی اہلیت کےبارے اختلافی فیصلے دئیے تھے۔ایک جج نے انہیں اہل اور دوسرے نے نااہل قرار دیا تھا۔

چیف الیکشن کمیشن نے فیصلے پر اختلاف رائے کی وجہ سے ریٹرنگ افسر کے شریف بردران کو اہل قرار دینے کا فیصلہ برقرار رکھا تھا۔

ڈاکٹر ایم محی الدین قاضی نے کہا کہ ان کے مؤکلین نے موقف اختیار کیا ہے کہ چیف الیکشن کمشنر، الیکشن ٹریبونل اور ریٹرنگ افسروں کے فیصلے آئین اور قانون سے متصادم ہیں۔

انہوں نے کہا کہ ایک الگ رٹ میں کہا گیا ہے کہ جب انہی بنیادوں پر شہبازشریف الیکشن لڑنے کے اہل نہیں رہے تو ان کے پی پی اڑتالیس بھکر سے بلامقابلہ کامیابی کے نوٹیفیکشن کو کالعدم قراردیاجائے۔

لاہور ہائی کورٹ کے تین ججوں جسٹس فضل میراں چوہان،جسٹس حسنات احمد اور جسٹس محمد احسن بھون پر مشتمل تین رکنی بنچ جمعرات کو اس بات کی سماعت کرے گا کہ یہ رٹ درخواستیں باقاعدہ سماعت کے قابل ہیں یا نہیں۔

ادھر الیکشن کمیشن سے شہباز شریف کی بلامقابلہ کامیابی کا نوٹیفیکیشن جاری ہوجانے کے بعد پنجاب اسمبلی کا اجلاس بلالیا گیاہے۔ یہ اجلاس چھ جون کو ہوگا لیکن اس سے پہلے یعنی جمعرات کی شام مسلم لیگ نون اور پیپلز پارٹی کی پارلیمانی پارٹیوں کا اجلاس بلا لیا گیا ہے۔

اس اجلاس میں مسلم لیگ نون کے صدرشہباز شریف کو وزارت اعلی کے عہدے کے لیے اتحادی جماعتوں کا امیدوار نامزد کیا جانا ہے۔

اسمبلی سے وزیر اعلٰی منتخب ہونے کے بعد شہباز شریف کو گورنر پنجاب سلمان تاثیر کے سامنے اپنے عہدے کا حلف اٹھانا ہوگا۔مسلم لیگ نون گورنر پنجاب کے بارے میں کئی بار اپنی ناپسندیدگی ظاہر کرچکی ہے۔مسلم لیگی صوبائی وزراء نے گزشتہ مہینے اس تقریب کا بائیکاٹ کیا تھا جس میں خود سلمان تاثیر نے گورنر کے عہدے کا حلف اٹھایا تھا۔

__________________