نواز بینظیر ملاقاتوں سے کوئی فر ق نہیں پڑ تا،منشور مطالبات کا حشر میثاق جمہوریت سے بد تر ہو گا،شجاعت



اسلام آباد (جنگ نیوز) پاکستان مسلم لیگ کے سربراہ سابق وزیراعظم چوہدری شجاعت حسین نے کہا ہے کہ منشور مطالبات کا حشر میثاق جمہوریت سے بھی بدتر ہوگا، اے پی ڈی ایم اور اے آر ڈی کوئی ایشو نہ ہونے کی وجہ سے غیر حقیقی مطالبات کر رہے ہیں،انہو ں نے کہا کہ بے نظیر ملاقاتوں سے کوئی فرق نہیں پڑے گا، الیکشن کے اعلان سے پہلے ہروقت الیکشن الیکشن کہنے والے آج کس منہ سے الیکشن کو موخر کرنے کی بات کر رہے ہیں، الیکشن ہرصورت میں وقت مقررہ پر ہوں گے، نواز شریف کے کاغذات نامزدگی ان کی اپنی سزا کے خلاف اپیل نہ کرنے کی وجہ سے مسترد ہوئے ہیں، نواز شریف کی محاذ آرائی کی سیاست کو عوام نے بالکل مسترد کر دیا ہے، ہماری جماعت پوری طرح سے متحد ہے،اس میں کوئی انتشار نہیں ہے، نواز شریف کی واپسی پر ان کی طرف جانے والوں کی کوئی لائن نہیں لگی، مسلم لیگ انتخابات میں پنجاب سے دوتہائی اور دوسرے صوبوں سے واضح اکثریت حاصل کرے گی۔ وہ بدھ کو اپنی رہائش گاہ پر ”اے پی پی“ سے خصوصی بات چیت کر رہے تھے۔ چودھری شجاعت حسین نے کہاکہ اگر نواز شریف اور بے نظیر بھٹو اکٹھے ہوتے ہیں تو اس سے اچھی ہمارے لئے کیا بات ہو سکتی ہے اور جہاں تک ان کے چارٹر آف ڈیمانڈ کا تعلق ہے تو وہ جب سامنے آئے گا تو اسے بھی دیکھیں گے۔ انہوں نے کہاکہ نواز شریف لاکھ یہ بات کریں کہ چارٹر آف ڈیمانڈ کا حشر میثاق جمہوریت جیسا نہیں ہوگا، قوم کو بخوبی علم ہے کہ اس کا حشر میثاق جمہوریت سے بھی بدتر ہوگا۔ انہوں نے کہاکہ اگر نواز شریف اور بے نظیر بھٹو اکٹھے ہوتے ہیں تو اس سے اچھی ہمارے لئے کیا بات ہو سکتی ہے۔انہوں نے نواز شریف اور شہباز شریف کے کاغذات نامزدگی مسترد ہونے اور ان کے انتخابی عمل سے باہر ہو جانے سے الیکشن کی ساکھ کے بارے میں سوال کے جواب میں کہاکہ نواز شریف کے کاغذات نامزدگی ان کی اپنی غلطی سے مسترد ہوئے ہیں جب انہیں کراچی سے خصوصی عدالت سے ہونے والی سزا کے خلاف اپیل کرنی تھی تو اس وقت وہ سعودی عرب جا کر محلات میں عیش و آرام کرنے لگے اور یہی وجہ ہے کہ ان کی سزا بحال رہی۔