اسلام آباد(خصوصی رپورٹر) وفاقی وزیر قانون وانصاف وپارلیمانی امور ڈاکٹر بابر اعوان نے کہا ہے کہ موجودہ جمہوری حکومت آئینی اداروں کا مکمل احترام کرتی ہے۔ مسلم لیگ (ن) اٹھارویں آئینی ترمیم سے متعلق اپنا موقف واضح کرے۔ 18 ویں ترمیم سے متعلق مقدمہ 5 ماہ سے سپریم کورٹ میں زیرسماعت ہے فیصلہ آنے کے بعد ججز تعینات کیے جائیں گے۔ ان خیالات کا اظہار انہوں نے اتوار کو اپنی رہائش گاہ پر پریس کانفرنس کرتے ہوئے کیا۔ انہوں نے کہا کہ 18 ویں ترمیم کے حوالے سے جو مقدمہ سپریم کورٹ میں چل رہا ہے اسے 5 ماہ گزر گئے ہیں۔ اس کا فیصلہ آنے کے بعد ججز تعینات کئے جائیں گے۔ انہوں نے کہا کہ صوبہ بلوچستان میں آئینی بحران کا کوئی امکان نہیں۔ 31 جولائی کے فیصلے کے بعد 5 اگست تک بلوچستان میں کوئی جج تعینات نہیں جبکہ 5 اگست سے 5 ستمبر تک بلوچستان ہائی کورٹ میں چیف جسٹس نہیں تھا تو اس وقت کوئی آئینی بحران پیدا نہیں ہوا تھا تو اب بھی نہیں ہوگا۔انہوں نے کہا کہ مسلم لیگ (ن) کے وکیل نے 18 ویں ترمیم کے حوالے سے سپریم کورٹ میں جو موقف اختیار کیا ہے اس حوالے سے پیپلزپارٹی سے بات نہیں کی گئی۔ مسلم لیگ (ن) 18 ویں ترمیم کے حوالے سے اپنے اصل موقف سے آگاہ کریں۔ انہوں نے کہا کہ ہم جلد ہی قومی اسمبلی کا اجلاس بلا رہے ہیں ۔ انہوں نے کہا کہ اس وقت سیلاب زدگان کی طرف توجہ کرنا ضروری ہے۔ انہوں نے کہا کہ سیالکوٹ اور بہاولپور میڈیکل کالج کا واقعہ لوگوں کے سامنے ہے ۔ بعض سیاسی رہنما فوٹو سیشن کرانے کیلئے سیالکوٹ جارہے ہیں۔ انہوں نے کہاکہ میاں نوازشریف قرض اتارو ملک سنوارو کا اکائونٹ نمبر بتائیں تاکہ سیلاب زدگان کی مدد کی جائے۔ ڈاکٹر بابر اعوان نے کہا کہ وزیر اعظم کے فلڈ ریلیف اکائونٹ میں ایک ارب 58 کروڑ روپے جمع ہوچکے ہیں ۔ یہ رقم سرکاری ملازمین کی تنخواہوں کے علاوہ ہے۔ انہوں نے کہا کہ پیپلزپارٹی وفاق کی سیاست کرنے والی جماعت ہے میاں نوازشریف کو فلڈ کمیشن قائم کرنے کیلئے تمام سیاسی جماعتوں کو اعتماد میں لینا چاہئے تھا۔انہوں نے کہا کہ ہماری قیادت کے پوری دنیا سے رابطے ہیں اس لئے پوری دنیا سیلاب زدگان کو فنڈز فراہم کر رہی ہے۔ ہم اسلامی ممالک ،او آئی سی اور رابطہ عالم اسلامی کا انتظار کر رہے ہیں کیونکہ ہماری قوم پوری امت مسلمہ کے دکھ میں برابر کی شریک ہوتی ہے۔

__________________
جاویداسد