نواز شریف نے ذاتی سکیورٹی کیلئے ہوم ڈیپارٹمنٹ کی تجویز مسترد کردی

اسلام آباد ۔۔۔۔خصوصی رپورٹ۔۔۔پاکستان مسلم لیگ ’’ن‘‘ کے قائد و سابق وزیراعظم میاں نواز شریف نے ذاتی سکیورٹی کے لئے ہوم ڈیپارٹمنٹ پنجاب کی تجویز مسترد کرتے ہوئے کہا ہے کہ وہ عوامی خزانے سے تین کروڑ روپے اپنی ذاتی سکیورٹی پر خرچ نہیں کریں گے ۔ذرائع کے مطابق 9 اپریل 2008 ء کو ہوم ڈیپارٹمنٹ پنجاب کے سیکرٹری محمد اعظم سلیم نے نواز شریف کے سکیورٹی ایڈوائزر مشتاق احمد کو لیٹر لکھا کہ محکمہ داخلہ کو نواز شریف کی سکیورٹی کیلئے تیس ملین روپے درکار ہیں جو سابق وزیراعظم کی رہائش گاہوں ‘ دفاتر اور دیگر جگہوں پر سکیورٹی بیئرئرز ‘ بنکرز ‘ کلوزسرکٹ مانٹرنگ سسٹم ‘ او پی پوسٹ کی تعمیر سٹیل کے گیٹ اور پلرز پر خرچ کئے جائیں گے۔ جس کے جواب میں میاں نواز شریف کے سکیورٹی ایڈوائزر نے اعتراض لگا کر تجویز مسترد کردی کہ سابق وزیراعظم عوامی خزانے سے تیس ملین روپے ذاتی سکیورٹی کیلئے خرچ کرنے کے حق میں نہیں سکیورٹی ایڈوائزر نے کہا کہ شریف برادران کی سکیورٹی کی ضرورت و اہمیت کو نظر انداز نہیں کیا جاسکتا لیکن شریف فیملی سکیورٹی کیلئے اتنی بڑی رقم خرچ کرنے کے حق میں نہیں سکیورٹی ایڈوائزر کے مطابق سابق وزیراعظم جب سے پاکستان آئے ہیں ان کو سکیورٹی کی اشد ضرورت رہی لیکن اپنی انتخابی مہم کے دوران بھی خاطر خواہ سکیورٹی فراہم نہیں کی گئی واضح رہے کہ پاکستان پیپلزپارٹی کے شریک چیئرمین آصف علی زرداری بھی حکومت کی جانب سے فراہم کئے جانے والے اسی طرح کے سیکورٹی انتظامات سے استعفادہ حاصل کررہے ہیں جن پر کروڑوں روپے کے اخراجات عوامی خزانے سے ادا کئے جاتے ہیں۔
٭٭٭٭٭