لاہور…مسلم لیگ(ن)کے سربراہ میاں نواز شریف نے3کروڑ روپے سے زائد سرکاری خرچ پر سیکیورٹی کی فراہمی کی حکومتی پیشکش مستردکردی اور کہا ہے کہ اپنی حفاظت کے لئے سرکاری خزانے سے اتنی بڑی رقم خرچ کرنا جائز نہیں سمجھتا۔مسلم لیگ(ن)کی طرف سے جاری پریس ریلیز میں کہا گیا ہے کہ پنجاب کی نگران حکومت نے9اپریل کو میاں نواز شریف کو ایک مراسلے کے ذریعے پیشکش کی تھی کہ انہیں اور ان کی بھائی شہباز شریف کو سرکاری خرچ پر سیکیورٹی فراہم کی جائے گی جس پر مجموعی طور پر تین کروڑ ،تین لاکھ روپے کے اخراجات آئیں گے۔محکمہ داخلہ پنجاب کے مراسلے میں کہا گیا ہے کہ میاں نواز شریف اور شہباز شریف کے گھروں کی حفاظت53لاکھ روپے ، حفاظتی رکاوٹوں پر ایک کروڑ 23لاکھ ، ایک کروڑ27لاکھ روپے،کلوز سرکٹ مانیٹرنگ اور مورچوں پر خرچ آئیں گے۔ پریس ریلیز میں کہا گیا ہے کہ میاں نواز شریف نے حفاظت کے لئے حکومتی پیشکش مسترد کرتے ہوئے کہا ہے کہ صدر مشرف کی غلط پالیسیوں کی وجہ سے پاکستان کا ہر شہری غیر محفوظ ہوچکا ہے لیکن اپنی حفاظت کے لئے سرکاری خزانے سے اتنی بڑی رقم خرچ کرنا جائز نہیں سمجھتے۔

__________________