لاہور ( رپورٹ ،ایم اے کے لودھی) سابق وزیراعظم اور مسلم لیگ (ن) کے سربراہ میاں محمد نواز شریف نے عام انتخابات میں حصہ لینے کا اصولی فیصلہ کر لیا ہے۔ اس کا باقاعدہ اعلان پیر کو بے نظیر بھٹو کے ساتھ ملاقات کے بعد ہو گا مسلم لیگ (ن) نے کہا ہے کہ سیاسی قوتوں کے لئے میدان خالی نہیں چھوڑا جائے گا۔ تاہم اس کا فیصلہ وہ پیر کو پیپلزپارٹی کی سربراہ بے نظیر بھٹو سے ملاقات کے بعد کریں گے۔ شریف خاندان کے قریبی ذرائع کے مطابق پارٹی وفاداران اور دوستوں کے ساتھ مشاورت اور گہرے غور و خوض کے بعد شریف خاندان اس نتیجے پر پہنچا ہے کہ اسے اپنی سابق حریف اعظم بے نظیر بھٹو کیلئے میدان خالی نہیں چھوڑنا چاہئے اور ان قوتوں کے ساتھ بھی سخت مزاحمت کی جانی چاہئے جنھوں نے گزشتہ پانچ برس میں اسٹیبلشمنٹ کی چھتری کے تحت حکومت کی ہے ۔ بتایا گیا ہے کہ ایک خاص بات جس نے انہیں اس فیصلے پر آمادہ کیا وہ یہ ہے کہ بقول ان کے اس وقت عوامی جذبات ان کے حق میں ہیں لہٰذا ان کو عوامی مینڈیٹ کے حصول کے لئے استعمال کیا جانا چاہئے۔مسلم لیگ ن کے ذرائع کے مطابق میاں نواز شریف نے اجلاس میں کہا کہ لوگوں کو سڑکوں اور چوراہوں پر احتجاج کے لئے نکالنے کے بجائے اس فیصلے پر آمادہ کیا جائے کہ وہ اپنے آئندہ حکمرانوں کے انتخاب کے سلسلے میں اپنے شعور کا مکمل مظاہرہ کریں کیونکہ انہوں نے ہی اپنے نمائندوں کو منتخب کرنا ہے ۔ ذرائع کے مطابق اور اگر ایسا ہو گیا کہ انتخابات میں دھاندلی اور کسی قسم کی کوئی انجینئرنگ کی گئی تو لوگوں کو کچھ بتانے کا ایک جواز بھی ہمارے پاس موجود ہو گا۔

__________________