نواز شریف کیساتھ شیر ہے جو بے نظیر کے اشاروں پر ناچتا ہے،پرویز الٰہی



لاہور (نمائندہ جنگ، الیکشن سیل) مسلم لیگ پنجاب کے صدر اور سابق وزیر اعلیٰ چوہدری پرویز الٰہی نے کہا ہے کہ نواز شریف کیسا شیر ہے جو بینظیر کے اشاروں پر ناچ رہا ہے، نواز اور بینظیر میں ایک بات مشترک ہے کہ یہ دونوں ڈیل کرکے واپس آئے ،ان دونوں کا پاکستان کی سلامتی اور غریب عوام کی ترقی سے کوئی سروکار نہیں۔ یہ بات انہوں نے گزشتہ روز یوحنا آباد حلقہ این اے 129میں بڑے جلسہٴ عام سے خطاب کرتے ہوئے کہی۔پرویز الٰہی نے کہا کہ میں مسیحی برادری کا خاص طور پر مشکور ہوں جنہوں نے ہمیشہ مسلم لیگ کا ساتھ دیا۔ انہوں نے کہا کہ مسلم لیگ کی حکومت نے اقلیتوں کیلئے بہت زیادہ کام کئے جس کا تمام کریڈٹ صدر پرویز مشرف کو جاتا ہے جنہوں نے اقلیتوں کو دُہرے ووٹ کا حق دیا اور بھٹو دور میں قومیائے گئے تمام مشنری ادارے مسیحوں کو واپس کردیئے ہمارے دور حکومت میں تمام کچّی آبادیوں میں رہنے والے تمام لوگوں کو مالکانہ حقوق دیئے گئے۔