ملتان،کوٹ ادو ۔۔۔۔۔۔۔ مسلم لیگ کے مرکزی رہنما چودھری پرویز الٰہی نے کہا کہ ہماری جماعت قائد اعظم کے افکار کی وارث اور وفاق کی علامت ہے نواز شریف کو چاہئے کہ وہ پنجاب میں زرداری اینڈ کمپنی کا برانچ آفس کھول لیں ان لوگوں کا مقصد اور مشن ہی لوٹ مار تھا وہ دونوں ہاتھوں سے لوٹ مار ہی کرتے رہے ہماری نیت ٹھیک تھی ہمیں اس کا پھل ملا ہے ہم نے عوام کی بہتری کے لئے کام کئے ہیں مسلم لیگ عام انتخابات میں بھاری اکثریت سے کامیاب ہو گی اور ملکی تعمیر و ترقی کا مشن جاری رکھے گی۔ وہ گزشتہ روز ملتان اور مظفر گڑھ میں انتخابی جلسوں سے خطاب کر رہے تھے۔ انہوں نے کہا کہ مسلم لیگ کی حکومت کو یہ اعزاز حاصل ہے کہ اس نے جنوبی پنجاب میں 130ارب روپے کے ترقیاتی کام مکمل کئے ہیں جس کی پنجاب کی تاریخ میں مثال نہیں ملتی انہوں نے کہا کہ ہمارے کاموں کی زندہ مثال سوا ارب کی لاگت سے کارڈیالوجی ہسپتال آپ کے سامنے ہے ڈینٹل کالج اور بچوں کا ہسپتال زیر تعمیر ہے سکول کالج بنے ہیں بچیوں کو 200روپے ماہانہ وظیفہ اسکولوں میں مفت کتابیں دی جا رہی ہیں اس علاقے سے ملک کے صدر وزیر اعلیٰ اور گورنر رہے ہیں لیکن اسلام آباد جا کر وہ عوام کو بھول گئے ۔ انہوں نے کہا کہ ہمیں بتایا جائے کہ پیپلز پارٹی نے اپنے دور اقتدار میں ایسا کون سا کام کیا ہے جسے پیش کیا جا سکے انہوں نے کوئی کام نہیں کیا۔ بیرونی اخبارات لکھ رہے کہ زرداری مسٹر ٹن پرسنٹ تھا کیا آپ ایسے کرپٹ لوگوں کو اقتدار میں لانا چاہتے ہیں پارٹی کے کارکن تو دوہرے صدمے سے دوچار ہیں ایک ان کی لیڈر دنیا سے رخصت ہو گئیں اور دوسرا زرداری نے پارٹی پر غاصبانہ قبضہ کر لیا ہے وہ کہتے ہیں کہ میں سونیا گاندھی بن کر کردار ادا کروں گا۔