لاہور ( نمائندگان جنگ/ایجنسیاں) سابق وزیراعظم اور مسلم لیگ (ن) کے قائد میاں نواز شریف کے کاغذات نامزدگی بھی مسترد کر دیئے گئے،اس پر رد عمل کا اظہار کرتے ہوئے نواز شریف نے کہا کہ میں پی سی او ججوں کو مانتا ہوں نہ اپیل کروں گا،انہوں نے کہا کہ کاغذات نامزدگی کا مسترد ہونا میری سمجھ سے بالا تر ہے،نواز شریف کے خلاف طیار ہ سازش کیس اور نیب کی جانب سے نااہلی کے حوالے سے اعتراضات داخل کئے گئے تھے،تفصیلات کے مطابق نواز شریف کے حلقہ این اے 120 سے کاغذات نامزدگی ریٹرننگ آفیسر نے مسترد کر دیئے ہیں جبکہ ان پر اعتراض کرنے والے (ق) لیگ کے امیدوار خواجہ طاہر ضیاء کے کاغذات منظورکر لئے گئے ہیں۔ میاں نوازشریف نے کہا ہے کہ کاغذات مسترد کرنے کو چیلنج نہیں کریں گے۔ انہوں نے کہاکہ مشرف حکومت نے مجھے انتخابات میں حصہ لینے کی اجازت کا کہا تھا لیکن اس فیصلے سے ظاہر ہوتا ہے کہ حکومت نہیں چاہتی کہ میں انتخابات میں حصہ لوں۔ ان کے خلاف ان کے مدمقابل (ق) لیگ کے خواجہ طاہر ضیاء، اسلام آباد کے صحافی شاہد اورکزئی اور ایک شہری رانا محمد اسلم نذیر نے اعتراضات اٹھائے تھے۔ خواجہ طاہر ضیاء نے میاں نواز شریف پر الزام عائد کیا تھا کہ وہ طیارہ سازش کیس میں سزا یافتہ ہیں اور سزا یافتہ شخص الیکشن میں حصہ نہیں لے سکتا۔ مقامی شہری رانا محمد اسلم نذیر نے اعتراض عائد کیا تھا کہ میاں نواز شریف کو ہیلی کاپٹر کیس میں نیب نے 21 سال کیلئے نااہل قرار دیا تھا، صدر نے ان کی سزائیں معاف تو کر دیں مگر جرم برقرار ہے جبکہ صحافی شاہد اورکزئی نے میاں نواز شریف پر سپریم کورٹ پر حملہ کرنے کے اعتراضات اٹھائے تھے۔ سوموار کے روز ریٹرننگ آفیسر نے ان اعتراضات کی سماعت کی۔ میاں نواز شریف کی طرف سے خواجہ حارث ایڈووکیٹ پیش ہوئے، تقریباً دو گھنٹے کی سماعت کے بعد ریٹرننگ آفیسر نے فیصلہ محفوظ کیا، جسے سہ پہر تقریباً 4 بجے سنا دیا گیا اس کے تحت میاں محمد نواز شریف کے طیارہ سازش کیس میں سزایافتہ ہونے کی بنیاد پر ان کے قومی اسمبلی کے حلقہ این اے 120 سے کاغذات نامزدگی مسترد کر دیئے گئے۔اے پی پی کے مطابق پاکستان مسلم لیگ (ن) کے سربراہ سابق وزیر اعظم نواز شریف نے کہا ہے کہ جس بھونڈے طریقے سے میرے کاغذات نامزدگی مسترد کئے گئے ہیں، یہ بھی ایک مثال ہے۔ میں دو مرتبہ ملک کا وزیر اعظم رہ چکا ہوں کوئی ڈاکو ‘بدمعاش یا دہشت گرد نہیں۔ صحافیوں سے بات چیت کرتے ہوئے انہوں نے کہا کہ حیران کن بات یہ ہے کہ 2002ء کے انتخابات کے وقت میں جدہ میں مقیم تھا تو میرے کاغذات نامزدگی منظور کر لئے گئے تھے، آج ملک میں میری موجودگی کے باوجود کاغذات نامزدگی کا مسترد ہونا میری سمجھ سے بالاتر ہے۔ انہوں نے واضح الفاط میں کہا کہ کاغذات نامزدگی مسترد ہونے کے خلاف اپیل دائر کرنا پرویز مشرف کی عدالتوں کو تسلیم کرنے کے مترادف ہو گا۔ یہ معاملہ اے پی ڈی ایم میں لے کر جائیں گے۔ ملک اور جمہوریت کو بچانے کے لئے ہماری جدوجہد جاری رہے گی۔ ایک سوال پر انہوں نے کہا کہ میرے کاغذات نامزدگی مسترد کر کے یہ ثابت کر دیا گیا ہے کہ مشرف حکومت شفاف انتخابات کرانے میں ہرگز سنجیدہ نہیں لیکن اس طرح کے ہتھکنڈے ہمارے عزم کو متزلزل نہیں کر سکتے۔ ہم اس ملک‘ قوم اور جمہوریت کو بچانے کے لئے اپنی جدوجہد جاری رکھیں گے،میں اپنے کاغذات مسترد کئے جانے کا معاملہ اے پی ڈی ایم میں لے کر جاؤں گا اور انہیں دعوت دی جائے گی کہ سب مل کر جمہوریت کی بحالی اور موجودہ آمروں سے نجات کیلئے جدوجہد کریں۔

بشکرہی جنگ