پاکستان کے سابق وزیرِ اعظم نواز شریف کو سات سال تک جلاوطن رہنے کے بعد پیر کی صبح پی آئی اے کی پرواز سے اسلام آباد کے ہوائی اڈے پر پہنچنے کے بعد حراست میں لے لیا گیا۔انہوں نے حکومتی آپشنز تسلیم کرنے سے انکار کر دیا تھا جس کے بعد انہیں منی لانڈرنگ اور کرپشن کے مقدمات کے تحت گرفتار کیا گیا۔ نواز شریف کو ہیلی کاپٹر میں اب کسی نامعلوم مقام پر لے جایا جا رہا ہے۔
بی بی سی کے نامہ نگار نے بتایا کہ انہوں نے دیکھا کہ نواز شریف کو راول لاؤنج سے ایک گاڑی میں بٹھا کر ایک ہیلی کاپٹر میں پہچایا گیا جہاں سے انہیں کسی نامعلوم مقام پر منتقل کیا جا رہا ہے۔

اس سے قبل جہاز میں نواز شریف اور حکام کے درمیان تقریباً نوے منٹ تک مذاکرات ہوتے رہے جہاں سابق وزیرِ اعظم سے ان کا پاسپورٹ بھی طلب کیا گیا لیکن انہوں نے اپنا پاسپورٹ حکام کے حوالے کرنے سے انکار کر دیا۔
مذاکرات کے بعد نواز شریف اپنے ساتھیوں سمیت اسلام آباد ائر پورٹ کے راول لاؤنج میں پہنچے جہاں دوبارہ حکام نے ان سے مذاکرات کیے۔ مقامی ٹیلی وژن چینلز کے مطابق نواز شریف کو جلاوطنی کا آپشن دیا گیا تھا لیکن انہوں نے اسے قبول کرنے سے انکار کر دیا۔

اس سے قبل جب جہاز اسلام آباد کے ہوائی اڈے پر پہنچا تو نواز شریف نے مختصر بات چیت میں کہا: ’اپنی سرزمین پر پہنچ کر مجھے وہ خوشی ہو رہی ہے کہ میں بیان نہیں کر سکتا۔انہوں نے تمام سیاسی قوتوں کو پیغام دیا کہ وہ مل جل کر جمہوریت کی بحالی کے لیے کام کریں۔

ہمارے نامہ نگاروں کے مطابق اس وقت ایئرپورٹ کے اطراف میں سکیورٹی انتہائی سخت ہے اور وہاں مسافروں کے علاوہ کسی کو جانے کی اجازت نہیں ہے۔

مسلم لیگ نواز گروپ نے سپریم کورٹ میں آئین کی دفعہ دو سو چار کے تحت حکومت کے خلاف توہینِ عدالت کی پیٹیشن بھی دائر کر دی ہے۔ پٹیشن میں کہا گیا ہے کہ سپریم کورٹ نے حکم دیا تھا کہ نواز شریف کی پاکستان آمد میں کوئی رکاوٹیں نہ پیدا کی جائیں لیکن حکومت نے اس حکم کی خلاف ورزی کی ہے۔

خبررساں اداروں کے مطابق اعلیٰ حکومتی اہلکار نواز شریف سے گفت و شنید میں مصروف ہیں لیکن ابھی یہ واضح نہیں کہ آیا انہیں کوئی پیشکش کی جا رہی ہے یا کسی بات کے لیے مجبور کیا جا رہا ہے یا بات چیت کا محور کوئی اور آپشن ہے۔

موبائل فون کے ذریعے طیارے میں موجود افراد سے رابطہ ممکن نہیں ہو رہا ہے۔

وفاقی وزیر ریلوے شیخ رشید احمد کا کہنا ہے کہ حکومت کے پاس چار پانچ آپشنز موجود ہیں۔ ان میں نظر بندی اور گرفتاری اور ڈی پورٹیشن اہم آپشنز بتائی جاتی ہیں۔ ہوائی اڈے میں موبائل کام نہیں کر رہے اور خیال ہے کہ انہیں جیم کر دیا گیا ہے۔

نواز شریف کی پاکستان آمد سے قبل پولیس نے مسلم لیگ نواز کے ان رہنماؤں کو گرفتار کر لیا جو مختلف ٹولیوں کی صورت میں ائرپورٹ جانا چاہتے تھے۔ پولیس نے راولپنڈی اور اسلام آباد ائرپورٹ کی طرف جانے والے دوسرے راستوں پر بھی مسلم لیگ کے کارکنوں کے خلاف کارروائی کی۔ شہباز شریف کے صاحبزادے حمزہ شہباز نے مقامی ٹیلی وژن چینل کو بتایا کہ پارٹی کے کئی اہم رہنما پولیس کی حراست میں ہیں۔

خبررساں ادارے اے پی کے مطابق سفر کے دوران طیارے پر موجود نواز شریف کے حامی ’گو مشرف گو‘ کے نعرے لگا رہے تھے۔

پاکستان کے سکیورٹی حکام نے اتوار سے ہی اسلام آباد ایئرپورٹ کے علاقے کو ممنوعہ قرار دیدیا تھا اور ایئرپورٹ جانے والی تمام سڑکوں پر سکیورٹی سخت کردی گئی تھی۔ صرف ایسے لوگوں کو ان راستوں سے ایئرپورٹ کی جانب دیا گیا جن کے پاس بیرون ملک سفر کے ٹکٹ موجود تھے۔
اسلام آباد ایئرپورٹ کے قریب موجود ہمارے نامہ نگار ذوالفقار علی نے بتایا ہے کہ علاقے میں سکیورٹی اتنی سخت ہے کہ پیر کی صبح سات بجے تک دور دور تک کوئی سیاسی کارکن دکھائی نہیں دیے۔

ایئرپورٹ کو جانے والی سڑکوں کو پولیس نے ٹرک کھڑا کرکے بلاک کردیا اور جگہ جگہ خاردار تار لگائے ہیں جبکہ ایئرپورٹ کے قریب والی عمارتوں پر رینجرز کے اہلکار تعینات ہیں۔ ہمارے نامہ نگار نے بتایا ہے کہ ایئرپورٹ کے اندر اور باہر پنجاب پولیس کے سینکڑوں اہلکار تعینات کیے گئے ہیں اور ایئرپورٹ کی جانب جانے والی تمام سڑکوں کے ارد گرد پولیس کے اہلکار تعینات ہیں۔

اتوار کی شام سابق وزیراعظم نواز شریف لندن کے ہییتھرو ہوائی اڈے سے پی آئی اے کی فلائٹ 786 سے روانہ ہوئے تھے۔ ان کے ساتھ ان کے بھائی شہباز شریف کو بھی پاکستان جانا تھا لیکن آخری وقت میں بتایا گیا کہ وہ پارٹی قیادت کے مشورے پر پاکستان نہیں جارہے ہیں۔

شہباز شریف نے بی بی سی اردو ڈاٹ کام سے بات کرتے ہوئے کہا کہ وہ تو پاکستان جانے کے لیے بے چین تھے لیکن پارٹی رہنما نے انہیں آخری وقت کہا ہے کہ وہ ابھی نہ جائیں۔ بی بی سی کے نامہ نگاروں کے مطابق اس لیے شہباز شریف اور اسحاق ڈار طیارے میں سوار نہیں ہوئے تھے۔
نواز شریف کا طیارہ مقررہ وقت سے تقریباً ایک گھنٹہ تاخیر سے لندن روانہ ہوا اور حکام نے اس کا سبب کسی مسافر کی ناساز طبیعت بتایا تھا۔ ہیتھرو ایئرپورٹ پہنچنے پر نواز شریف کے استقبال کے لیے سینکڑوں سیاسی کارکن موجود تھے۔ پہلے یہ کہا گیا تھا کہ نواز شریف گلف ایئرلائنز سے مسقط کے ذریعے پاکستان جائیں گے لیکن آخری لمحات میں یہ بات سامنے آئی کہ انہوں نے پاکستان انٹرنیشنل ایئرلائنز سے سفر کرنا بہتر سمجھا۔

ان کے ہمراہ جانےوالے صحافیوں نے بتایا کہ جلاوطن وزیراعظم کے لئے پاکستان کے سرکاری طیارے پر ایک عرصے کے بعد سفر کرنا جذباتی موقع تھا۔ نواز شریف دسمبر سنہ دو ہزار میں سعودی حکومت کی مداخلت کے نتیجے میں ایک ’معاہدے‘ کے تحت اپنے تمام خاندان سمیت جدہ چلے گئے تھے۔

حکومت کا کہنا ہے کہ معاہدے کے تحت نواز شریف دس سال تک پاکستان میں سیاست کر سکتے ہیں نہ واپس آ سکتے ہیں۔ تاہم نواز شریف کا کہنا ہے کہ یہ مدت دس سال کی نہیں بلکہ پانچ برس کی تھی جو پوری ہو چکی ہے۔

ہیتھرو سے روانہ ہونے سے قبل خود سابق وزیرِاعظم نے یہ عندیہ نہیں دیا ہے کہ اگر انہیں وطن واپس جانے دیا جاتا ہے تو انتخابی مہم کے علاوہ ان کی سیاسی حکمتِ عملی کس نوعیت کی ہوگی۔ وزیرِ اطلاعات محمد علی درانی گزشتہ چند دنوں میں یہ کہہ چکے ہیں کہ حکومت اعلانات کی بجائے نواز شریف کے کسی عملی اقدام پر ردِ عمل کا اظہار کرے گی۔

بی بی سی