نوجوان نے لال چوک کے گھنٹہ گھر پر نیشنل کانفرنس کا جھنڈا اتار کر پاکستانی پرچم لہرا دیا
سوموار 17 ستمبر 2007


سرینگر : سرینگر کے لال چوک میں ایک نامعلوم نوجوان نے گھنٹہ گھر سے نیشنل کانفرنس کا جھنڈا اتار کر پاکستانی پرچم لہرا دیا۔ سیکیورٹی فورسز نے نوجوان پردھاوا بول کر لہو لہان کر دیا۔
تفصیلات کے مطابق گزشتہ روز سرینگر کے لال چوک میں ایک گمنام نوجوان نے گھنٹہ گھر سے نیشنل کانفرنس کا پرچم اتارکر وہاں پاکستان کا جھنڈا لہرایاجس کے بعد سی آر پی ایف اہلکاروں نے مذکورہ نوجوان کو لہولہان کردیا۔ یہ حیرت انگیز واقعہ صبح ساڑھے گیارہ بجے کے قریب رونما ہوا جب لگ بھگ 30سال کی عمر کا درمیانہ جسامت کا نوجوان لالچوک میں گھنٹہ گھر کے اردگرد کئی چکر لگانے کے بعد اس کی دیوار پر چڑ ھ گیا اور وہاں حال ہی میں آویزاں کئے گئے نیشنل کانفرنس کے چھوٹے جھنڈوں کی رسی کاٹ ڈالی اور پارٹی کے پرچم اکھاڑ پھینکے۔ عینی شاہدین نے بتایا کہ اس دوران مذکورہ نامعلوم نوجوان جو "اللہ اکبر" کے نعرے لگارہاتھا، نے جیب سے پاکستانی جھنڈا نکال کر اسی رسی کے ساتھ باندھ دیا جس کے ساتھ نیشنل کانفرنس کے جھنڈے لگائے گئے تھے۔ عینی شاہدین نے مزید بتایا کہ مذکورہ نوجوان جب کچھ دیر تک وہاں سے دور رہنے کے بعد دوبارہ اسی دیوار پر چڑھا تو گھنٹہ کی محافظت پر مامور سی آر پی ایف اہلکار بنکر سے باہر آئے اور گمنام نوجوان پر ٹوٹ پڑے اس موقع پر فورسز اہلکاروں نے اسے دبوچ کر اس کا شدید زدوکوب کیا اور اسے بندوق کی بٹھو ں سے مارا جسکے نتیجے میں اس کے منہ اور چہرے سے خون نکل آیا۔ اس دوران موقع پر موجود لوگوں نے نے مداخلت کرکے اسے فورسز اہلکاروں کے چنگل سے یہ کہہ کر بچالیا کہ اس کا دماغی توازن ٹھیک نہیں ہے۔ چنانچہ اسی اثناء میں مذکورہ نوجوان زور زور سے چیختے ہوئے وہاں سے چلاگیا۔

__________________