نورووائرس“ سے پھیلنے والے معدے کے مریض گھروں میں رہیں،ڈاکٹرز



لندن (سٹاف رپورٹر) جراثیم کے باعث پھیلنے والے معدے کے مرض کا شکار کارکنوں پر زور دیا گیا ہے کہ وہ گھروں میں رہیں۔ سرجریوں اور ہسپتالوں تک میں نہ جائیں۔ ڈاکٹروں سے فون پر مشورہ لیں۔ ڈاکٹروں کے اس مشورہ سے معیشت کو کروڑوں پونڈ کا نقصان ہو گا۔ یہ وبا پورے ملک میں پھیل رہی ہے اور ہر ہفتہ ایک لاکھ افراد اس کا شکار ہو رہے ہیں۔ اس سے اچانک قے ہونا شروع ہو جاتی ہے اور ہیضہ کی صورت ہو جاتی ہے۔ اس سال سرما میں اب تک دو ملین افراد کو یہ بیماری لگی ہے یہ تعداد گزشتہ سال کے مقابلہ میں دوگنا زیادہ ہے۔ تعطیلات سے لوٹنے والے اکثر کارکنوں نے پہلے ہی کام پر اطلاع کر دی ہے کہ وہ بیمار ہو گئے ہیں چونکہ وبا پھیلنے کا خطرہ ہے اس لئے فیملی ڈاکٹر انہیں گھروں میں رہنے کا مشورہ دے رہے ہیں۔ این ایچ ایس ڈائریکٹ نے کہا ہے کہ جن مریضوں نے انہیں فون کیا ہے ان میں سے زیادہ نے قے اور ہیضہ کی شکایت کی ہے۔ یہ بیماری عام طور پر دو روز رہتی ہے جبکہ وہ دفاتر، سکولوں، ہسپتالوں اور جیلوں میں آسانی سے پھیلتی ہے۔ ملک بھر کے 70 ہسپتالوں نے نئے مریضوں کے لئے اپنی وارڈز بند کر دی ہیں تاکہ یہ مرض مزید نہ پھیلے۔ ایک ہسپتال ٹرسٹ نے ”نان ارجنٹ“ آپریشن بھی بند کر دیئے ہیں اور وزیٹرز کی ہسپتالوں میں جانے کی حوصلہ شکنی کی جا رہی ہے۔ وارڈ سکاٹ لینڈ میں زیادہ بند کئے گئے ہیں۔ گریٹر مانچسٹر میں 26 وارڈ بند کئے گئے ہیں جس کا یہ مطلب ہے کہ ہر وارڈ میں 26 بستر خالی رہیں گے۔ وورسٹر شائر ایکیوٹ ہسپتال ٹرسٹ نے متعدد آپریشن منسوخ کر دیئے ہیں۔ بیڈفورڈ میں ایک اور برسٹل میں دو نے وارڈ نئے داخلہ کے لئے بند کر دیئے ہیں۔ وائرس کو ”نورو وائرس“ کا نام دیا گیا ہے یہ وائرس والے کسی شخص سے رابطہ سے پھیلتی ہے۔ یہ خطرناک ہے لیکن بچوں اور بوڑھوں کو زیادہ خطرہ ہے کیونکہ انہیں ڈی ہائیڈریشن ہو سکتی ہے جو پیچیدہ صورت اختیار کر سکتی ہے۔