اسلام آباد(طاہر خلیل … نمائندہ جنگ) اسلام آباد میں عام انتخابات کے انعقاد کے سلسلے میں عبوری نگراں حکومت کی تشکیل کیلئے مشورے مکمل اور تیاریاں آخری مرحلے میں ہیں‘ قومی قیادت نے جس میں صدر‘ وزیراعظم‘ مسلم لیگ کے سربراہ اور دیگر پالیسی ساز اداروں کے عہدیدار شامل ہیں‘ چیئرمین سینیٹ محمدمیاں سومرو کو عبوری نگراں حکومت کا سربراہ بنانے پر اتفاق کرلیا ہے۔ بدھ کی شب اسلام آباد میں اعلیٰ سطح پر مشاورتی اجلاس میں محمد میاں سومرو کے ساتھ وزیراعظم کے خصوصی معاون اور صوبہ سرحد کے سابق گورنر کمانڈر (ر) خلیل الرحمن کا نام بھی نگراں وزیراعظم کے طور پر زیر تجویز رہا۔ ذمہ دار ذرائع کے مطابق صدر اس بارے میں حتمی فیصلے کا اعلان کل (15 نومبر کو) کریں گے اور نگراں وزیراعظم اور ان کی کابینہ کے وزراء 16 نومبر کو حلف اٹھائیں گے۔ ذرائع نے یہ بھی بتایا ہے کہ پنجاب کے نگراں وزیراعلیٰ کیلئے لاہور ہائی کورٹ کے سابق چیف جسٹس اعجاز نثار کے نام پر بھی اتفاق ہوگیاہے جبکہ سندھ اور بلوچستان میں نگراں حکومتوں کے بارے میں آج فیصلہ متوقع ہے۔ ذرائع نے مزید بتایا ہے کہ آئندہ عام انتخابات نئے لیگل فریم ورک آرڈر(lfo) کے تحت کرانے کی تجویز پر سنجیدگی سے غور کیا جارہا ہے۔ 2002ء کے انتخابات بھی ایل ایف او کے تحت کرائے گئے تھے اور تمام سیاستدانوں نے لیگل فریم ورک آرڈر پر دستخط کئے تھے۔ نیا ایل ایف او پی سی او کے تحت نافذ کیا جائے گا جس میں سیاسی جماعتوں کیلئے نئے انتخابی رولز آف دی گیم طے کئے جائیں گے۔

__________________