3 دسمبر 2010
کراچی(مانیٹرنگ ڈیسک)کراچی پولیس نے فوجی سامان سے بھرے نیٹو کے دو کنٹینرز برآمد کرکے چھ افراد گرفتار کرلئے ہیں۔تفصیلات کے مطابق پولیس نے خفیہ اطلاع پر رزاق آباد کے گودام میں چھاپہ مارا اور تلاشی کے دوران گودام میں کھڑے کنٹینرز سے فوجی ساز و سامان برآمد ہوا جس کے بعد علاقہ پولیس نے موقع سے چھ افراد گرفتار کرلئے۔ آج نیوز کے مطابق گرفتار شدگان میں ٹریلر ڈرائیور رزاق، وحید، محمد زوار، شاہ گل، خاور اور عزیز شامل ہیں۔ پولیس کے مطابق ملزمان پورٹ قاسم سے نکلنے والے نیٹو کنٹینرز غائب کرکے اُن میں سے کچھ سامان چوری کرلیتے تھے اور اِس کے بعد کنٹینرز افغانسان روانہ کردیتے جاتے تھے۔ ملزمان سیل توڑے بغیر کنٹینرز کھولنے کے ماہر ہیں۔ ملزمان نے ابتدائی تفتیش میں چار سال سے نیٹو کا قیمتی سامان چوری کرنے کا اعتراف کیا ہے۔ پولیس کے مطابق کنٹینرز سے برآمد ہونے والے سامان میں نائٹ وژن دوربین، ہائی بیٹری ٹارچ، مورچے بنانے کا سامان، گاڑیوں کے فاضل پرزہ جات اور دیگر قیمتی سامان شامل ہے۔

__________________
جاویداسد