اسلام آباد . . . سپریم کورٹ نے افغان ٹرانزٹ ٹریڈ کی آڑ میں اسمگلنگ اور افغانستان میں متعین اتحادی افواج کے نام پر کنٹینرز لائے جانے کے مقدمات کو سماعت کیلئے یکجاکرتے ہوئے ممبرکسٹمزکونوٹس جاری کردیاہے۔چیف جسٹس جسٹس افتخار محمد چوہدری نے ریمارکس میں کہاہے کہ کسٹمز حکام کی وجہ سے قومی خزانے کو اور نیٹو کنٹینرز کے ذریعے اسمگلنگ سے قومی معیشت کو نقصان پہنچ رہا ہے۔ چیف جسٹس کی سربراہی میں سپریم کورٹ کے بنچ نے اسلام آباد کے قریب ترنول کے مقام پر کنٹینر سے غیرملکی شراب کی ہزاروں اسمگل شدہ بوتلیں برآمدکئے جانے کے مقدمہ کی سماعت کی ۔ چیف جسٹس نے اٹارنی جنرل کو مخاطب کرتے ہوئے کہا کہ اسمگلنگ میں تمام لوگ ملے ہوئے ہیں اور دیکھ لیجئے گا، اس کیس میں ملوث خاتون افسرکوبھی بڑافسربنادیاجائے گا۔ بنچ کے رکن جسٹس طارق پرویز نے ریمارکس میں کہا کہ ہزاروں کنٹینر افغان سرحد عبور کرتے ہیں جبکہ ان کامال پشاور کی مارکیٹوں میں کھلے عام بکتاہے۔چیف جسٹس نے مزید ریمارکس میں کہا کہ نیٹو غیرقانونی طور پر اشیا پاکستان لارہی ہے، جس سے ملکی معیشت تباہ ہورہی ہے۔انہوں نے ممبر کسٹمز پر برہمی کا اظہار کرتے ہوئے کہا کہ سب نے ملک کو کھوکھلا کرنے کا ٹھیکہ لیا ہوا ہے۔ ممبر کسٹمز کا کہنا تھا کہ صرف ریلوے اور این ایل سی کو اشیا افغانستان لے جانے کی اجازت ہے اور این ایل سی نے پرائیویٹ کنٹریکٹرز کو این او سی بھی جاری کررکھے ہیں ۔عدالت میں کسٹمز اندراج سے مبینہ طورپرلاپتا11 ہزار نیٹو کنٹینرز کا معاملہ زیر غور آیا تو اس کو بھی کنٹینرز کیس سے منسلک کرنے کا حکم دے دیا گیا، مقدمے کی مزیدسماعت جمعرات کوکی جائے گی۔

__________________
جاویداسد