ایک ایسا ویب براؤزر جسے استعمال کرتے ہوئے بہت سے لوگوں نے پہلی بار انٹرنیٹ استعمال کیا تھا اب غائب ہونے والا ہے۔
نیٹ سکیپ نیویگیٹر کی موجودہ مالک کمپنی ’اے او ایل‘ نے یکم مارچ 2008 کے بعد اس براؤزر کی ’سپورٹ‘ بند کرنے کا اعلان کیا ہے۔

نوے کی دہائی میں جب تجارتی بنیادوں پر انٹرنیٹ عام ہونا شروع ہوا تھا تو نوے فیصد انٹرنیٹ صارفین نیٹ سکیپ نیویگیٹر ہی استعمال کرتے تھے تاہم مائیکرو سافٹ کے انٹرنیٹ ایکسپلورر اور پھر فائر فوکس کی آمد سے یہ شرح اب صرف اعشاریہ چھ فیصد رہ گئی ہے۔

نیٹ سکیپ کمپنی کا کہنا ہے کہ اس کے صارفین کو چاہیے کہ وہ اپنے براؤزر فلاک یا فائر فوکس سے اپ گریڈ کر لیں کیونکہ یہ دونوں براؤزر اسی ٹیکنالوجی کے تحت بنے ہیں جس پر نیٹ سکیپ کو بنایا گیا تھا۔

فائر فوکس بنانے والی کمپنی موزیلا فاؤنڈیشن کی اہم رکن مشیل بیکر نے بی بی سی نیوز سے بات کرتے ہوئے کہا کہ ان کے خیال میں وہ اس امید کی نمائندہ ہیں جو لوگوں کو نیٹ سکیپ سے تھی۔
انہوں نے کہا کہ’ ہم نے نیٹ سکیپ سے ایسی بہت سی چیزیں لیں جو انہوں نے متعارف کروائی تھیں لیکن ہم انہیں عوام کی شرکت کے حوالے سے کہیں آگے لے گئے ہیں‘۔

یاد رہے کہ نیٹ سکیپ کو مارک اینڈریسن نے تخلیق کیا تھا اور ان کی کمپنی اس کا پہلا ورژن 1994 میں سامنے لائی تھی۔

نیٹ سکیپ کے صارفین اس کی بندش اور نئے براؤزر پر منتقلی کے مشورے سے خوش نہیں۔ نیٹ سکیپ بلاگ پر بھیجے جانے والے ایک تبصرے میں کہا گیا ہے کہ ’میں اداس ہوں۔ فلاک میں بہتری کی ضرورت ہے جبکہ میں فائر فاکس کے انٹرفیس سے خوش نہیں۔ میں یتیم ہو گیا ہوں‘۔ ایک اور تبصرے میں امید ظاہر کی گئی ہے کہ نیٹ سکیپ دوبارہ واپس آئے گا۔

بشکریہ بی بی سی

__________________