نیپال میں آئین ساز اسمبلی کے انتخابات میں اب تک جو نتائج حاصل ہوئے ہیں ان میں ماؤنوازوں کی سیاسی جماعت نے برتری حاصل کر لی ہے۔
پیر کی صبح تک جاری کیے گیے 189 نشستوں کے نتائج میں 106 نیپال کی کمیونسٹ پارٹی (ماؤنوازوں) کو حاصل ہوئی ہے۔

پارٹی کے چیئرمین پشپ کمل دہل عرف پراچنڈ کٹھمنڈ کے دس نمبر حلقے سے فاتح قرار دیئے جا چکے ہیں۔

نیپالی کانگریس کو دس نشستیں حاصل ہوئی ہیں جبکہ نیپال کی کمیونسٹ پارٹی (متحدہ مارکسی لینن ) کو 13 سے زائد نشستیں ملی ہیں۔

مدھیشی جن آدھیکار فورم یعنی مقامی عوامی حقوق کی جماعت کو پانچ سیٹیوں پر کامیابی ملی ہے۔وہیں دو نشستوں پر نیپال مزدور کسان پارٹی نے فتح حاصل کی ہے۔

جن نشستوں کے رجحانات حاصل ہو رہے ہیں ان میں دو تہائی پرماؤنوازوں کو برتری حاصل ہے۔

تجزیہ کاروں کے مطابق جس قسم کے رجحانات مل رہے ہیں اس سے بظاہر ماؤنوازوں کو آئین ساز اسمبلی میں اکثریت حاصل ہو جائے گی۔

ووٹوں کی گنتی کا کام سست رفتار سے جاری ہے کیونکہ کچھ نشستوں کو چھوڑ کر کہيں بھی الیکٹرانک ووٹنگ مشین کا استعمال نہیں ہوا ہے۔

ماؤنواز رہنما پرچنڈ نے جیت حاصل کرنے کے بعد کہا ہے کہ ان کی پارٹی امن کے معاہدے کو ہی آگے بڑھائے گی۔انہوں نے مزيد کہا کہ ان کی پارٹی نیپال کے پڑوسی ممالک ، ہندوستان اور چین سے بہتر تعلقات قائم رکھنا چاہے گي۔

پراچنڈ نے مزيد کہا کہ اکثریت حاصل ہونے پر ماؤنواز آئین ساز اسمبلی میں سبھی کو ایک ساتھ لےکر چلیں گے اور نیپال کی اقتصادی ترقی اور روزگار کے مواقع تلاش کرنا ان کی پہلی ترجیح ہوگي۔

نیپال میں انیس سو ننانوے کے بعد یہ پہلا الیکشن ہے۔

یہ الیکشن آئین ساز اسمبلی کے لیے ہے جو ملک کا نیا آئین ترتیب دے گی اور توقع ہے کہ ملک سے بادشاہت کا خاتمہ کرے گی جس کے لیے ماؤنواز دس سال سے مسلح تحریک چلا رہے تھے۔

نیپال کی آئین ساز اسمبلی چھ سو ایک ارکان پر مشتمل ہو گی جن میں دو سو چالیس کا انتخاب براہِِ راست ہو گا جبکہ تین سو پینتیس کا انتخاب پارٹیوں کی طرف سے حاصل کردہ ووٹوں کی بنیاد پر ہوگا۔ اس کے علاوہ چھبیس ارکان کو عبوری کابینہ کی طرف سے نامزد کیا جائے گا۔

ماؤنواز باغیوں کا اصل گڑھ ترائی کا علاقہ ہے۔ یہ پہلی مرتبہ ہے کہ ماؤنواز پارٹی بیلٹ پیپر کے ذریعہ اپنی طاقت کا مظاہرہ کرنے کی کوشش کر رہی ہے۔

الیکشن کمیشن کے مطابق ساٹھ فیصد لوگوں نے حق رائے دہی کا استعمال کیا۔ پولنگ کا عمل کم و بیش پر امن رہا اور اکیس ہزار میں سے صرف 33 میں دوبارہ پولنگ کرانے کا حکم دیا گیا ہے۔

نیپال میں پر امن پولنگ پر خوشیاں منائی جارہی ہیں۔ ملک کے بڑے انگریزی روزنامے کٹھمنڈو پوسٹ نے شہ سرخی لگائی ہے کہ ’نیپال نے دنیا اور خود کو بھی حیرت زدہ کر دیا۔‘

اقوام متحدہ کے سیکریٹری جنرل بان کی مون نے بھی پر امن الیکشن کرانے پر نیپال کو مبارکباد دی ہے۔

__________________