لاہور (جنگ نیوز) پاکستان مسلم لیگ کے مرکزی نائب صدر و سابق وفاقی وزیر اطلاعات و نشریات سینیٹر محمد علی درانی نے کہا ہے کہ پاکستان پیپلز پارٹی اور ن لیگ نے ملکی سطح پر سیٹ ایڈجسٹمنٹ کا اعلان کرکے یہ واضح کر دیا ہے کہ وہ پاکستان مسلم لیگ کی مقبولیت سے خائف ہیں اور انہیں اپنی شکست سامنے نظر آرہی ہے۔ اور یہ خود کو بڑی جماعتیں کہلانے والوں کیلئے مقبولیت کی کمی کا منہ بولتا ثبوت ہے۔ وہ پیر کے روز مسلم لیگ ہاؤس میں ایک پرہجوم پریس کانفرنس سے خطاب کر رہے تھے۔ محمد علی درانی نے کہا کہ ڈیل کے ذریعے مقدمات ختم کرا کر الیکشن پراسیس کا حصہ بننے والی بینظیر بھٹو کا یہ بیان کہ اگر پیپلز پارٹی پہلے اور ن لیگ دوسرے نمبر پر نہ آئی تو وہ یہ سمجھیں گی کہ الیکشن منصفانہ نہیں ہوئے۔ اس بات کی عکاسی کرتا ہے کہ بینظیر بھٹو الیکشن نہیں سلیکشن چاہتی ہیں ۔ محمد علی درانی نے کہا کہ تمام پارٹیاں‘ ورکرز اور ووٹروں کو یہ مطالبہ کرنا چاہئے کہ بینظیر بھٹو اپنا یہ بیان واپس لیں۔ انہوں نے کہا کہ نواز شریف اور بینظیر کا عوام کے ساتھ رویہ ایسا رہا تو انہیں چاہئے کہ 9 جنوری کو اپنے سامان کی پیکنگ ضرور کرلیں کیونکہ یہ نام نہاد قائدین موسم سرما کی چھٹیاں منانے پاکستان آئے ہوئے ہیں اور ہماری خواہش ہے کہ یہ گرمیوں کی چھٹیاں بھی پاکستان میں گزاریں اس کیلئے ضروری ہے کہ وہ اپنی سوچ اور پالیسیوں میں تبدیلیاں لائیں۔محمد علی درانی نے کہا کہ ماضی کی روایات کو ختم کرکے الیکشن صاف‘ شفاف اور منصفانہ منعقد کئے جارہے ہیں۔ جس کے دو مراحل مکمل ہو چکے ہیں اور اب تیسرا مرحلہ کامیابی کے ساتھ جاری ہے۔ محمد علی درانی نے ایک سوال کے جواب میں کہا کہ عوام کی اکثریت کی یہ رائے ہے کہ آئندہ وزیر اعظم چوہدری پرویز الٰہی ہو لیکن اس کا فیصلہ مجاز فورم (قومی اسمبلی) ہی کریگا۔ انہوں نے کہا کہ پاکستان مسلم لیگ کے صدر چوہدری شجاعت حسین آج (منگل) سے اپنی انتخابی مہم کا آغاز مزار قائد سے کرینگے۔

__________________