لاہور (وقائع نگار خصوصی) پیپلزپارٹی پنجاب اور اس کی صوبائی پارلیمانی پارٹی نے پنجاب اسمبلی کے اندر اور باہر اپوزیشن کا بھرپور کردار ادا کرنے کا اعلان کرتے ہوئے کہا ہے کہ اب پنجاب میں امن و امان کی خراب صورتحال، دانش سکولوں کے فراڈ سمیت تمام غیر قانونی، غیر آئینی اقدامات پر حکومت کو بے نقاب کریں گے۔ رائیونڈ کی ”لوٹا فاﺅنڈری“ نے جمہوریت کو سخت نقصان پہنچایا ہے۔ پیپلزپارٹی پنجاب اور صوبائی پارلیمانی پارٹی کا اجلاس گزشتہ روز صوبائی صدر امتیاز صفدر وڑائچ کی صدارت میں پنجاب اسمبلی کمیٹی روم میں ہوا۔ ایک قرارداد کے ذریعے صدر آصف زرداری اور وزیراعظم یوسف رضا گیلانی کی قیادت پر اعتماد کا اظہار کیا گیا۔ اجلاس کے بعد پنجاب اسمبلی کے باہر پارٹی ارکان کے ہمراہ پریس کانفرنس سے خطاب کرتے ہوئے امتیاز صفدر وڑائچ نے کہا ہم نے فیصلہ کیا ہے کہ پنجاب میں آئین اور قانون کے تحت اپوزیشن کا کردار ادا کریں گے۔ پنجاب میں اس وقت ڈکیتیاں، چوریاں، اغوا برائے تاوان کے واقعات عروج پر ہیں۔ ان پر بات کریں گے۔ دانش سکولوں کے فراڈ پر بھی بات کریں گے اور یہ بھی بتائیں گے کہ صوبے میں غریب عوام کے ہزاروں سکولوں کی چھتیں بھی نہیں۔ اب رائیونڈ کی بھی بات ہو گی۔ انہوں نے کہا ریمنڈ ڈیوس کا واقعہ پنجاب میں ہوا۔ تفتیش پنجاب میں ہو رہی ہے۔ عدالت بھی پنجاب میں ہے۔ اس لئے اب ریمنڈ جانے یا رائیونڈ جانے۔ انہوں نے کہا ہمیں اصل بیماری کا پتہ ہے۔ ن لیگ لانگ مارچ کرنا چاہتی ہے لیکن پنجاب کا رخ بدل چکا ہے۔ پیپلزپارٹی لانگ مارچ روکنا جانتی ہے۔ ہم ان کو رائیونڈ چھوڑ کر آئیں گے۔ پیپلزپارٹی کے صوبائی پارلیمانی لیڈر راجہ ریاض نے کہا ہم تمام لوٹا فیکٹریاں توڑ دیں گے۔ پیپلز پارٹی اب پنجاب میں عوام کا کیس لڑے گی۔ پریس کانفرنس سے قبل اور اس کے دوران پیپلزپارٹی کے ارکان نے ”لوٹا فاﺅنڈری ہائے ہائے“ ، ”لوٹا کریسی نہیں چلے گی“ ، ”رائیونڈ لوٹا فیکٹری بند کرو“ کی زبردست نعرے بازی کی۔

روزنامہ جنگ راولپنڈی

__________________

(وَقُل رَّبِّ ارْحَمْهُمَا كَمَا رَبَّيَانِي صَغِيرًا) اے میرے رب جس طرح انہوں نے مجھے بچپن سے پالا ہے اسی طرح تو بھی ان پر رحم فرما۔ (الاسراء: 23)